વોશિંગ્ટન: અમેરિકા અને ઈરાન વચ્ચે ચાલી રહેલા ભીષણ યુદ્ધને આજે બે મહિના પૂર્ણ થયા છે, ત્યારે પ્રમુખ ડોનાલ્ડ ટ્રમ્પે અત્યંત આક્રમક તેવર બતાવ્યા છે. બુધવારે વહેલી સવારે સોશિયલ મીડિયા પ્લેટફોર્મ 'ટ્રુથ સોશિયલ' પર એક પોસ્ટ મૂકીને ટ્રમ્પે ઈરાનના નેતાઓને "વહેલી તકે સુધરી જવા" અને તેમના પરમાણુ કાર્યક્રમનો ત્યાગ કરવા કડક સૂચના આપી છે. ટ્રમ્પે પોતાની પોસ્ટમાં AI દ્વારા જનરેટ કરેલો એક ફોટો પણ શેર કર્યો છે, જેમાં તેઓ હાથમાં AK-47 રાઈફલ લઈને ઉભા છે અને પાછળ વિસ્ફોટો થઈ રહ્યા છે. આ ફોટો સાથે તેમણે સ્લોગન લખ્યું છે- "No more Mr. Nice Guy!" (હવે કોઈ ભલાઈ બતાવવામાં આવશે નહીં).
વ્હાઇટ હાઉસ અત્યારે ઈરાનના વલણથી ભારે નારાજ છે. ઈરાનની માંગ છે કે જ્યાં સુધી શાંતિ સમજૂતી ન થાય અને તેલના વેપાર માટે મહત્વની ગણાતી 'સ્ટ્રેટ ઓફ હોર્મુઝ' (હોર્મુઝની સામુદ્રધુની) સંપૂર્ણપણે ખોલવામાં ન આવે, ત્યાં સુધી તેઓ પરમાણુ મુદ્દે કોઈ વાતચીત કરશે નહીં. બીજી તરફ, અમેરિકાના સેક્રેટરી ઓફ સ્ટેટ માર્કો રુબિયોએ જણાવ્યું હતું કે, ઈરાન માત્ર એક કટ્ટરપંથી દેશ નથી પણ તે પોતાની ક્રાંતિને અન્ય દેશોમાં નિકાસ કરવા માંગે છે. હિઝબુલ્લાહ અને હમાસ જેવા જૂથોને ટેકો આપીને તે આખા વિસ્તાર પર વર્ચસ્વ જમાવવા માંગે છે, અને જો આવા દેશ પાસે પરમાણુ હથિયાર આવી જાય તો તે સમગ્ર વિશ્વ માટે જોખમી સાબિત થશે.
રુબિયોએ વધુમાં ઉમેર્યું કે, ઈરાન અત્યારે વિશ્વના 20 થી 25 ટકા ઉર્જા સ્ત્રોતોને (તેલના રૂટને) બંધક બનાવીને આખા વિશ્વને આર્થિક રીતે ડરાવી રહ્યું છે. આ દરમિયાન, અમેરિકાના સંરક્ષણ સચિવ (War Secretary) પીટ હેગસેથ આજે કેપિટોલ હિલ ખાતે સાંસદોના પ્રશ્નોના જવાબ આપવાના છે. 28 ફેબ્રુઆરીથી શરૂ થયેલા 'ઓપરેશન એપિક ફ્યુરી' (Operation Epic Fury) બાદ આ પ્રથમ મહત્વની સુનાવણી છે.
નોંધનીય છે કે, ટ્રમ્પ વહીવટીતંત્રએ વર્ષ 2027 માટે 1.5 ટ્રિલિયન ડોલરના રેકોર્ડ બ્રેક સંરક્ષણ બજેટનો પ્રસ્તાવ મૂક્યો છે. આ બજેટમાં ઈરાન સાથેના યુદ્ધના ખર્ચ અને સૈન્યને વધુ આધુનિક બનાવવા પર ભાર મૂકવામાં આવ્યો છે. અત્યારે સમગ્ર વિશ્વની નજર આ યુદ્ધ કઈ દિશામાં જશે તેના પર ટકેલી છે, કારણ કે ટ્રમ્પના આ નવા અંદાજે યુદ્ધ વધુ ભયાનક બનવાના સંકેતો આપ્યા છે.