મુંબઈ : મહારાષ્ટ્રના ભારતીય જનતા પાર્ટીના નેતા અને મંત્રી નિતેશ રાણેએ રાજ્યમાં આગામી નવરાત્રિ મહોત્સવ દરમિયાન ગરબા અને દાંડિયાના કાર્યક્રમોમાં મુસ્લિમોના પ્રવેશ પર પ્રતિબંધ મૂકવાની વિશ્વ હિન્દુ પરિષદ (VHP) ની માંગણીનું ખુલ્લેઆમ સમર્થન કર્યું છે. એક ઈન્ટરવ્યૂ દરમિયાન પોતાના વિચારો રજૂ કરતા તેમણે આક્ષેપ કર્યો હતો કે નવરાત્રિ જેવા તહેવારો દરમિયાન "લવ જેહાદ" ની ઘટનાઓમાં વધારો જોવા મળે છે, જેના કારણે આવા આયોજનોમાં કડક નિયંત્રણો જરૂરી છે.

નિતેશ રાણેએ સ્પષ્ટ શબ્દોમાં જણાવ્યું હતું કે જે લોકો મૂર્તિપૂજામાં વિશ્વાસ ધરાવતા નથી અથવા હિન્દુ આસ્થાને માનતા નથી, તેમણે હિન્દુ ધાર્મિક તહેવારો અને ઉત્સવોથી દૂર રહેવું જોઈએ. તેમણે સૂચન કર્યું હતું કે ગરબા પંડાલોમાં પ્રવેશતા પહેલા તમામ લોકોની ઓળખની ચકાસણી થવી જોઈએ અને તેમણે હનુમાન ચાલીસાનો પાઠ કરવો જોઈએ.

VHP ની માર્ગદર્શિકા: તિલક અને ઓળખ કાર્ડ ફરજિયાત કરવાની માંગ

અત્રે ઉલ્લેખનીય છે કે વિશ્વ હિન્દુ પરિષદે ગરબા આયોજકો માટે વિશેષ માર્ગદર્શિકા જાહેર કરીને માંગ કરી હતી કે પંડાલોમાં પ્રવેશતી વખતે સહભાગીઓની સરકારી ઓળખ પત્રો દ્વારા ખરાઈ કરવામાં આવે અને તેમના કપાળ પર તિલક લગાવવામાં આવે. આ ઉપરાંત, ગણેશોત્સવ દરમિયાન ડીજે અને સાઉન્ડ સિસ્ટમ્સ પર મૂકવામાં આવતા નિયંત્રણો અંગે બોલતા રાણેએ સવાલ ઉઠાવ્યો હતો કે તમામ ધાર્મિક સરઘસો માટે નિયમો સમાન હોવા જોઈએ અને માત્ર હિન્દુ પરંપરાઓને જ લક્ષ્ય બનાવવાનું બંધ થવું જોઈએ.