નવી દિલ્હી : તહેવારોની મોસમ શરૂ થવાની સાથે જ સોના અને ચાંદીના બજારમાંથી એક મોટા સમાચાર સામે આવ્યા છે. દિવાળી અને ધનતેરસ જેવા પવિત્ર તહેવારો નજીક છે ત્યારે સોનાના ભાવમાં નોંધપાત્ર નરમાઈ જોવા મળી છે, જેના કારણે સોનું ખરીદવાનું આયોજન કરી રહેલા ગ્રાહકોમાં આશાનો સંચાર થયો છે. જો કે, આ વૈશ્વિક બજારની અનિશ્ચિતતા, મધ્ય પૂર્વમાં વધતા તણાવ અને ક્રૂડ ઓઇલના ઊંચા ભાવોને કારણે સોનાની કિંમતોમાં સતત ઉતાર-ચઢાવ જોવા મળી રહ્યો છે, જેના પર નિષ્ણાતોની પણ ચાંપતી નજર છે.

મલ્ટી કોમોડિટી એક્સચેન્જ (MCX) ના તાજેતરના આંકડાઓ અનુસાર, ભારતીય બજારમાં સોનાના ભાવ ૦.૪૨ ટકાના ઘટાડા સાથે રૂ. ૧,૪૭,૩00 પ્રતિ ૧૦ ગ્રામ પર ટ્રેડ થઈ રહ્યા છે. આંતરરાષ્ટ્રીય બજારમાં પણ તેની સીધી અસર જોવા મળી છે, જ્યાં હાજર સોનું ૦.૩ ટકા ઘટીને $૪,૧૨૮.૯૨ પ્રતિ ઔંસ થયું છે, જ્યારે ડિસેમ્બર ડિલિવરી માટેનો યુએસ સોનાનો વાયદો પણ ઘટીને $૪,૧૪૮.૫૦ પ્રતિ ઔંસ પર પહોંચ્યો છે. સોનાના ભાવમાં આવેલા આ અચાનક ઘટાડા પાછળ ક્રૂડ ઓઇલના ભાવોમાં થયેલો ઉછાળો મુખ્યત્વે જવાબદાર છે. મધ્ય પૂર્વમાં પ્રવર્તતા તણાવ અને તેલ પુરવઠામાં વિક્ષેપની આશંકાએ બ્રેન્ટ ક્રૂડના ભાવને પાંચ મહિનાના ઉચ્ચતમ સ્તરે પહોંચાડી દીધા છે.

ક્રૂડ ઓઇલના વધતા ભાવો વૈશ્વિક સ્તરે ફુગાવાને વેગ આપે છે, જેના કારણે કેન્દ્રીય બેંકો વ્યાજ દરો નીચા રાખવાનું ટાળે છે. યુએસ ફેડરલ રિઝર્વની આગામી ૨૭ અને ૨૮ ઓક્ટોબરે યોજાનારી મહત્ત્વપૂર્ણ બેઠક પર રોકાણકારોની નજર ટકેલી છે. જો ફેડરલ રિઝર્વ વ્યાજ દર અંગે કડક રૂખ અપનાવશે તો સોનાના ભાવ પર વધુ દબાણ આવી શકે છે, જ્યારે નરમ વલણ અપનાવવાથી સોનાને નવું સમર્થન મળી શકે છે. આંતરરાષ્ટ્રીય બજારો ઉપરાંત ડોલર સામે રૂપિયાની ચાલ અને આયાત ડ્યુટી પણ ભારતીય બજારમાં સોનાના સ્થાનિક ભાવ નક્કી કરવામાં નિર્ણાયક ભૂમિકા ભજવે છે.

તહેવારો ટાણે સોનું ખરીદવા ઈચ્છતા ગ્રાહકો માટે સૌથી મોટો પ્રશ્ન એ છે કે શું ધનતેરસ સુધીમાં ભાવ હજુ ઘટશે કે નહીં. બજારના નિષ્ણાતોના મતે માત્ર ભાવ વધુ ઘટવાની રાહ જોઈને ખરીદી મુલતવી રાખવી જોખમી સાબિત થઈ શકે છે, કારણ કે વૈશ્વિક પરિસ્થિતિ બદલાતા જ ભાવ ફરી ઉછળી શકે છે. તેથી ગ્રાહકોએ માત્ર ૧૦ ગ્રામના આંકડા પર નજર રાખવાને બદલે હોલમાર્ક, સોનાની શુદ્ધતા, મેકિંગ ચાર્જ અને લાગુ પડતા કરવેરાની પૂરી માહિતી મેળવીને જ પોતાની જરૂરિયાત મુજબ ખરીદીનો નિર્ણય કરવો જોઈએ.