ઓટ્ટાવા, તા.૦૮: ભારત અને કેનેડા વચ્ચે લાંબા સમયથી ચાલી રહેલા રાજદ્વારી તણાવની વચ્ચે એક અત્યંત મહત્વના સમાચાર સામે આવ્યા છે. કેનેડિયન પોલીસે શીખ અલગતાવાદી નેતા હરદીપ સિંહ નિજ્જરની હત્યામાં ભારત સરકારની સીધી સંડોવણી હોવાના દાવાઓને સત્તાવાર રીતે નકારી કાઢ્યા છે. અમેરિકાની અદાલત દ્વારા ગેંગસ્ટર લોરેન્સ બિશ્નોઈ અને ગોલ્ડી બ્રાર પર નિજ્જરની હત્યાનો આરોપ મૂકાયાના ગણતરીના કલાકોમાં જ કેનેડા પોલીસનું આ મોટું નિવેદન આવ્યું છે.
કેનેડાના ડેપ્યુટી કમિશનર ઓફ પોલીસ લિસા મોરલેન્ડે વિદેશી મીડિયા સીબીસી (CBC) સાથેની વાતચીતમાં સ્પષ્ટ કર્યું હતું કે, આ મામલો સંપૂર્ણપણે સંગઠિત ગુનાખોરી (ઓર્ગેનાઈઝ્ડ ક્રાઈમ) સાથે જોડાયેલો છે. તેમણે જણાવ્યું કે આ કેસની ચાલી રહેલી તપાસમાં અત્યાર સુધી એવા કોઈ પુરાવા બહાર આવ્યા નથી જે ભારત સરકારને આ હત્યાકાંડ સાથે સીધી રીતે જોડે છે. ઉલ્લેખનીય છે કે અગાઉ કેનેડાના તત્કાલીન વડાપ્રધાન જસ્ટિન ટ્રુડોએ ભારતીય એજન્ટો પર "વિશ્વસનીય આરોપો" મૂક્યા હતા, જેને નવી દિલ્હીએ સખત શબ્દોમાં ફગાવી દીધા હતા. નિજ્જર એક કેનેડિયન નાગરિક હતો જેને ભારતે આતંકવાદી જાહેર કર્યો હતો.
આ વિવાદ ત્યારે ફરી વકર્યો જ્યારે અમેરિકાના લોસ એન્જલસમાં એક ફેડરલ કોર્ટે જેલમાં બંધ લોરેન્સ બિશ્નોઈ અને તેના સાથી ગોલ્ડી બ્રાર પર ૧૮ જૂન, ૨૦૨૩ ના રોજ બ્રિટિશ કોલંબિયાના સરેમાં એક ગુરુદ્વારાની બહાર નિજ્જર પર ગોળીબાર કરવાનો આદેશ આપવાનો સત્તાવાર આરોપ મૂક્યો. યુએસ તપાસ એજન્સીના મતે, બિશ્નોઈએ જેલમાંથી જ પ્રતિબંધિત સેલફોનનો ઉપયોગ કરીને આ ઓપરેશનના આદેશ આપ્યા હતા અને શૂટર્સને નિજ્જરના ફોટોગ્રાફ્સ અને સરનામા મોકલ્યા હતા. જોકે, અમેરિકી એટર્ની બિલ એસેલી સહિતના કોઈપણ અધિકારીએ આમાં ભારત સરકાર સામેલ હોવાનો કોઈ દાવો કર્યો નથી.
બીજી તરફ, આ સમગ્ર ઘટનાક્રમ વચ્ચે એફબીઆઈ (FBI) ના ભારતીય મૂળના ડિરેક્ટર કાશ પટેલે સોશિયલ મીડિયા પર એક ચોંકાવનારી પોસ્ટ શેર કરી છે. તેમણે 'ઓપરેશન હાર્ડ બોલ' (Operation Hard Ball) અંતર્ગત આંતરરાષ્ટ્રીય સંગઠિત ગુનાખોરીના નેટવર્કને કચડી નાખવાની એફબીઆઈની સફળતાની જાહેરાત કરી હતી. કાશ પટેલે જણાવ્યું કે, એજન્સીએ ૨૪ વ્યક્તિઓની ધરપકડ કરી છે અને ભારત સ્થિત ૩ આંતરરાષ્ટ્રીય ગુનાહિત જૂથો સાથે જોડાયેલા ૩૭ લોકો પર ખંડણી, ડ્રગ્સની હેરફેર અને ટાર્ગેટેડ હત્યાઓના આરોપ મૂક્યા છે. આ પોસ્ટમાં તેમણે હરદીપ સિંહ નિજ્જરનો ઉલ્લેખ "એક અગ્રણી ભારતીય રાજકીય અને ધાર્મિક વ્યક્તિ" તરીકે કર્યો હતો, જેને લઈને પણ ટેક જગત અને રાજદ્વારી વર્તુળોમાં ચર્ચા જાગી છે.