નવી દિલ્હી : ઈરાન અને અમેરિકા વચ્ચેના તણાવપૂર્ણ સંબંધોમાં એક મહત્વપૂર્ણ રાજદ્વારી હિલચાલ જોવા મળી રહી છે. ઈરાનના વિદેશ મંત્રાલયના પ્રવક્તા ઇસ્માઇલ બકાઈએ સ્પષ્ટ કર્યું છે કે હાલમાં વોશિંગ્ટન સાથે જે વાટાઘાટો ચાલી રહી છે, તે સંપૂર્ણપણે પ્રાદેશિક સંઘર્ષોને સમાપ્ત કરવા પર કેન્દ્રિત છે. તેમણે ભારપૂર્વક કહ્યું કે, અત્યાર સુધી પરમાણુ મુદ્દાઓ અંગે કોઈ ચર્ચા થઈ નથી. આ નિવેદન અમેરિકાના સેક્રેટરી ઓફ સ્ટેટ માર્કો રુબિયોના તે દાવા બાદ આવ્યું છે જેમાં તેમણે તેહરાન અને વોશિંગ્ટન વચ્ચે શાંતિ કરારની સંભાવના વ્યક્ત કરી હતી.
વૈશ્વિક અર્થતંત્ર માટે અત્યંત મહત્વની એવી હોર્મુઝ સ્ટ્રેટ અંગે પણ ઈરાને મોટું નિવેદન આપ્યું છે. પ્રવક્તાએ જણાવ્યું કે ઈરાન કોઈ પણ જહાજ પર વધારાનો ટોલ લાદવા માંગતું નથી, અને તેના બદલે ઓમાન સાથે મળીને દરિયાઈ સુરક્ષા માટે એક સ્થાયી પદ્ધતિ વિકસાવવા પર કામ કરી રહ્યું છે. આ દિશામાં પહેલું પગલું ભરતા, ઈરાની નૌકાદળે IRGC ના સંકલન સાથે 32 વાણિજ્યિક જહાજો, જેમાં તેલ ટેન્કર્સ અને કન્ટેનર જહાજો સામેલ હતા, તેમને સુરક્ષિત રીતે સ્ટ્રેટમાંથી પસાર કર્યા હતા.
આ તરફ, અમેરિકાના સેક્રેટરી ઓફ સ્ટેટ માર્કો રુબિયો હાલ ભારતના પ્રવાસે છે. તેમણે નવી દિલ્હીમાં ક્વાડ વિદેશ પ્રધાનોની બેઠકમાં ભાગ લેતા જણાવ્યું હતું કે, શાંતિનો માર્ગ અત્યંત જટિલ છે અને પ્રમુખ ડોનાલ્ડ ટ્રમ્પ કોઈ પણ 'ખરાબ કરાર' સ્વીકારવા તૈયાર નથી. તેમણે લેબનોનમાં ચાલી રહેલ અસ્થિરતા માટે હિઝબુલ્લાહને જવાબદાર ઠેરવ્યું હતું અને પશ્ચિમ એશિયામાં શાંતિ સ્થાપવાના પ્રયાસોને વૈશ્વિક સ્તરે સમર્થન મળી રહ્યું હોવાનું જણાવ્યું હતું.
હોર્મુઝ સ્ટ્રેટ કે જે વિશ્વનો લગભગ ૨૦% ઉર્જા પુરવઠો વહન કરે છે, ત્યાં આ વર્ષની શરૂઆતમાં થયેલા સંઘર્ષો બાદ હવે સ્થિતિ સામાન્ય થઈ રહી છે. ઈરાન અને અમેરિકા વચ્ચેની આ મુત્સદ્દીગીરી જો સફળ થશે, તો તે માત્ર પશ્ચિમ એશિયા માટે જ નહીં પરંતુ સમગ્ર વિશ્વ માટે ઉર્જા સુરક્ષા અને આર્થિક સ્થિરતાના સંદર્ભમાં એક મોટું પગલું સાબિત થશે. હાલમાં તમામ પક્ષો રાજદ્વારી માર્ગો ખુલ્લા રાખીને શાંતિ માટે પ્રયત્નશીલ જણાય છે.