​નવી દિલ્હી : થાઈલેન્ડના ફુકેતથી ભારતની રાજધાની નવી દિલ્હી આવી રહેલી એર ઈન્ડિયાની ફ્લાઈટમાં ચાલુ મુસાફરી દરમિયાન સર્જાયેલા ગંભીર ટર્બ્યુલન્સના કિસ્સામાં એક અત્યંત ચોંકાવનારો વળાંક આવ્યો છે. આકાશમાં ભયાનક આંચકાઓ અનુભવ્યા બાદ દિલ્હીના ઈન્દિરા ગાંધી ઈન્ટરનેશનલ (IGI) એરપોર્ટ પર ઉતરાણ કરનાર આ એરબસ A320 વિમાનના મુખ્ય કેપ્ટનનો સાયકોએક્ટિવ સબ્સ્ટન્સ (કેફી/નશાકારક પદાર્થો) માટે કરાયેલો ડોપ ટેસ્ટ પોઝિટિવ આવ્યો હોવાનો ગંભીર દાવો કરવામાં આવ્યો છે. જોકે, એર ઈન્ડિયા તંત્ર દ્વારા હજુ સુધી આ સેમ્પલ રિપોર્ટ પોઝિટિવ હોવાની સત્તાવાર પુષ્ટિ કરવામાં આવી નથી, પરંતુ જો આ દાવો સાચો સાબિત થશે તો હવાઈ સુરક્ષાના નિયમોનું આ એક અત્યંત ભયાનક અને જીવલેણ ઉલ્લંઘન ગણાશે.

​હવામાં ૩૦૦ ફૂટ નીચે ખાબક્યું વિમાન, કેબિનમાં ચીસાચીસ મચી

​પ્રાપ્ત વિગતો અનુસાર, ગત ૪ ઓગસ્ટે ફુકેતથી દિલ્હી આવી રહેલી એર ઈન્ડિયાની ફ્લાઈટ લેન્ડિંગના થોડા સમય પહેલા જ આકાશમાં ભયાનક ટર્બ્યુલન્સની લપેટમાં આવી ગઈ હતી. માત્ર ૩૦ સેકન્ડના સમયગાળામાં જ વિમાન અચાનક આશરે ૩૦૦ થી ૪૨૫ ફૂટ જેટલું નીચે પટકાયું હતું. વિમાન ૧૬૦૦ ફૂટ પ્રતિ મિનિટની અત્યંત ઝડપે નીચે તરફ ખાબકતા જ કેબિનની અંદર પ્રવાસીઓમાં ભારે નાસભાગ અને ચીસાચીસ મચી ગઈ હતી. પૂરતી સુરક્ષા વગર અથવા સીટબેલ બાંધ્યા વગર બેઠેલા અનેક મુસાફરો પોતાની સીટો પરથી ઉછળીને સીધા કેબિનની છત તેમજ આસપાસના ભાગો સાથે જોરથી અથડાયા હતા.

​૪ ક્રૂ મેમ્બર્સ સહિત ૧૭ પ્રવાસીઓ ઈજાગ્રસ્ત થયા

​આ અણધાર્યા અને ભયાનક આંચકાઓને કારણે વિમાનમાં સવાર ૧૩ પ્રવાસીઓ અને ૪ ક્રૂ મેમ્બર્સ મળી કુલ ૧૭ લોકો ગંભીર રીતે ઘાયલ થયા હતા. ક્રૂ મેમ્બર્સને કરોડરજ્જુ (સ્પાઈનલ) ભાગે ઈજાઓ પહોંચી હોવાનું સામે આવ્યું છે. આશરે ૪ થી ૫ મિનિટ સુધી હવામાં સર્જાયેલી આ કટોકટી વચ્ચે કેબિન ક્રૂ દ્વારા મુસાફરોને તુરંત પોતાની સીટ પર બેસીને સીટબેલ બાંધી લેવાની સતત વિનંતીઓ કરવામાં આવી હતી. જોકે, બંને પાઈલટોએ ભારે મુશ્કેલી બાદ વિમાન પરનું નિયંત્રણ પુનઃ મેળવી લીધું હતું અને સવારે આશરે ૧૧:૦૦ વાગ્યે દિલ્હી એરપોર્ટ પર વિમાનનું સુરક્ષિત ઇમરજન્સી લેન્ડિંગ કરાવવામાં સફળતા મેળવી હતી.

​લેન્ડિંગ બાદ લેવાયા સેમ્પલ: તપાસનો ધમધમાટ શરૂ

​દિલ્હી એરપોર્ટ પર વિમાન સુરક્ષિત રીતે ઉતર્યા બાદ તમામ ઘાયલ મુસાફરો અને ક્રૂ મેમ્બર્સને તાત્કાલિક તબીબી સારવાર પૂરી પાડવામાં આવી હતી. નિયમ મુજબ લેન્ડિંગ બાદ કેપ્ટનનું તબીબી પરીક્ષણ કરીને તેમનો ડોપ ટેસ્ટ લેવામાં આવ્યો હતો, જેમાં સાયકોએક્ટિવ પદાર્થોની હાજરી હોવાનો દાવો સામે આવતા એવિએશન સેક્ટરમાં ખળભળાટ મચી ગયો છે.

​બીજી તરફ, આ ઘટનાની ગંભીરતાને ધ્યાનમાં રાખીને એક મુસાફરે ડાયરેક્ટોરેટ જનરલ ઓફ સિવિલ એવિએશન (DGCA) સમક્ષ લિખિત ફરિયાદ નોંધાવીને કડક તપાસની માંગ કરી છે. નાગરિક ઉડ્ડયન મંત્રાલય અને તપાસ એજન્સીઓએ વિમાનના બ્લેક બોક્સ એટલે કે કોકપિટ વોઈસ રેકોર્ડર (CVR) અને ફ્લાઈટ ડેટા રેકોર્ડર (FDR)ને કબજે કરીને ઘટનાનું ટેકનિકલ પૃથ્થકરણ શરૂ કરી દીધું છે, જેથી આકાશમાં બનેલી ઘટના અને પાઈલટની ભૂમિકા અંગેનું પૂરેપૂરું સત્ય બહાર આવી શકે.