ગાંધીનગર, તા.15: ભારત અને સંયુક્ત આરબ અમીરાત (UAE) વચ્ચેના મજબૂત સંબંધો હવે ગુજરાતના દરિયાકાંઠે એક નવી આર્થિક ક્રાંતિ લાવવા જઈ રહ્યા છે. વડાપ્રધાન નરેન્દ્ર મોદીની તાજેતરની UAE મુલાકાત દરમિયાન ગુજરાત માટે એક મોટી જાહેરાત કરવામાં આવી છે. દેવભૂમિ દ્વારકા જિલ્લાના વાડીનાર ખાતે હવે વિશ્વકક્ષાનું 'શિપ રિપેર ક્લસ્ટર' સ્થપાશે. આ પ્રોજેક્ટ માટે કેન્દ્રીય મંત્રીમંડળે અગાઉ જ ₹1570 કરોડના માતબર ખર્ચને મંજૂરી આપી દીધી હતી, જેના પર હવે બંને દેશોએ મહોર લગાવી દીધી છે.
 
ગ્લોબલ મેરીટાઇમ હબ બનશે ગુજરાત
વડાપ્રધાન મોદી અને UAE ના રાષ્ટ્રપતિ શેખ મોહમ્મદ બિન ઝાયેદ અલ નાહ્યાનની હાજરીમાં થયેલા આ કરારથી વાડીનાર હવે જહાજોના સમારકામ માટેનું આંતરરાષ્ટ્રીય કેન્દ્ર બનશે. અત્યાર સુધી મોટા જહાજોના સમારકામ માટે વિદેશી બંદરો પર નિર્ભર રહેવું પડતું હતું, પરંતુ હવે અત્યાધુનિક ટેકનોલોજી અને UAE ના સહયોગથી આ સુવિધા ગુજરાતમાં જ ઉપલબ્ધ થશે. આનાથી હજારો લોકોને પ્રત્યક્ષ અને પરોક્ષ રોજગારીની તકો સાંપડશે.
સંરક્ષણ અને ઉર્જા ક્ષેત્રે પણ 'બૂસ્ટર ડોઝ'
માત્ર શિપ રિપેરિંગ જ નહીં, પરંતુ બંને દેશો વચ્ચે વ્યૂહાત્મક પેટ્રોલિયમ અનામત અને LPG ના પુરવઠાને લઈને પણ મહત્વના સમજૂતી કરાર (MoU) થયા છે. આ ઉપરાંત, 'વ્યૂહાત્મક સંરક્ષણ ભાગીદારી' હેઠળ બંને દેશો સુરક્ષા ક્ષેત્રે વધુ નિકટ આવશે, જે અરબી સમુદ્રમાં ભારતની સ્થિતિને વધુ મજબૂત બનાવશે.
બેંકિંગ અને ઇન્ફ્રાસ્ટ્રક્ચરમાં 5 બિલિયન ડોલરનો વરસાદ
આ મુલાકાતની સૌથી મોટી સફળતા આર્થિક રોકાણ ગણવામાં આવે છે. ભારતીય ઇન્ફ્રાસ્ટ્રક્ચર પ્રોજેક્ટ્સ સહિત RBL બેંક અને સન્માન કેપિટલ જેવા નાણાકીય એકમોમાં UAE તરફથી અંદાજે 5 બિલિયન યુએસ ડોલર (આશરે ₹41,000 કરોડથી વધુ) ના રોકાણની જાહેરાત કરવામાં આવી છે. આ મૂડીરોકાણ ભારતીય અર્થતંત્રને ગતિ આપવાની સાથે બેંકિંગ ક્ષેત્રને વૈશ્વિક સ્તરે વધુ સક્ષમ બનાવશે.
 
મુખ્ય આકર્ષણો:
•    વાડીનાર શિપ રિપેર ક્લસ્ટર: ₹1570 કરોડનું રોકાણ.
•    કુલ રોકાણ: 5 બિલિયન ડોલરના વિવિધ ક્ષેત્રોમાં કરાર.
•    ઉર્જા સુરક્ષા: LPG અને પેટ્રોલિયમ અનામત માટે મજબૂત સહયોગ.
•    સુરક્ષા: નવી વ્યૂહાત્મક સંરક્ષણ ભાગીદારીનો પ્રારંભ.
આ ઐતિહાસિક મુલાકાતથી ભારત-UAE ના સંબંધો નવી ઊંચાઈએ પહોંચ્યા છે અને ગુજરાત ફરી એકવાર વૈશ્વિક નકશા પર રોકાણ માટેના હોટસ્પોટ તરીકે ઉભરી આવ્યું છે.