નવી દિલ્હી : દેશની રાજધાની દિલ્હી અને તેની આસપાસના વિસ્તારો (NCR) ટૂંક સમયમાં જ ટ્રાફિકની સમસ્યાથી મુક્તિ મેળવીને વિશ્વના સૌથી આધુનિક પરિવહન નેટવર્ક્સમાં સામેલ થવા જઈ રહ્યા છે. મંગળવારે છ-લેન એક્સેસ-કંટ્રોલ્ડ 'DND-સોહના હાઈવે' ના નિરીક્ષણ દરમિયાન કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ દિલ્હી-NCR ના સમગ્ર ટ્રાન્સપોર્ટ માળખાના આધુનિકીકરણનો રોડમેપ જાહેર કર્યો હતો. સરકાર હવે માત્ર રસ્તાઓ નથી બનાવી રહી, પરંતુ આવનારી પેઢીઓની જરૂરિયાતોને ધ્યાનમાં રાખીને એક એવું નેટવર્ક તૈયાર કરી રહી છે, જે આર્થિક વિકાસને નવી ગતિ આપશે.

મંત્રી નીતિન ગડકરીએ માહિતી આપતા જણાવ્યું હતું કે દિલ્હી-NCR ક્ષેત્રમાં અત્યાર સુધીમાં અંદાજે ₹૮૭,૦૦૦ કરોડના ખર્ચે ૧,૮૫૦ કિલોમીટરથી વધુના રોડ પ્રોજેક્ટ્સ પૂર્ણ કરી લેવામાં આવ્યા છે. આટલું જ નહીં, હાલમાં ₹૧૩,૦૦૦ કરોડના ખર્ચે ૨૨૫ કિલોમીટરના નવા રોડ પ્રોજેક્ટ્સ યુદ્ધના ધોરણે નિર્માણાધીન છે, જ્યારે ભવિષ્યની જરૂરિયાતોને પહોંચી વળવા માટે ₹૩૪,૫૦૦ કરોડના પ્રોજેક્ટ્સ પાઇપલાઇનમાં છે. આ પ્રોજેક્ટ્સ માત્ર સમય બચાવશે તેવું નથી, પરંતુ લાખો લીટર ઇંધણની બચત કરીને પ્રદૂષણમાં ધરખમ ઘટાડો કરવામાં પણ પથદર્શક સાબિત થશે.

દિલ્હીના કચરાથી બનશે હાઈવે: પ્રદૂષણ સામે ડબલ એટેક

આ પ્રોજેક્ટનું સૌથી આકર્ષક અને પ્રશંસનીય પાસું દિલ્હીના કચરાનો હાઈવે નિર્માણમાં ઉપયોગ છે. દિલ્હીના મુખ્યમંત્રી રેખા ગુપ્તાએ આ પહેલની પ્રશંસા કરતા કહ્યું કે, કેન્દ્ર અને દિલ્હી સરકારના સુમેળભર્યા સંકલનને કારણે રાષ્ટ્રીય રાજધાનીને તેનો સીધો લાભ મળી રહ્યો છે. દિલ્હીના કચરાના ઢગલા (Landfills) નો ઉપયોગ કરીને હાઈવે બનાવવાથી શહેરની સુંદરતા વધી છે અને પ્રદૂષણ ઘટાડવામાં મોટી સફળતા મળી છે. તેમણે કહ્યું કે, "આ પ્રોજેક્ટથી દિલ્હીના કચરાના ડુંગરોની ઊંચાઈ ઓછી કરવામાં જે સફળતા મળી છે, તે ખરેખર ક્રાંતિકારી છે."

આર્થિક વિકાસ અને લોજિસ્ટિક્સનું નવું કેન્દ્ર

એક્સપ્રેસવે, રિંગ રોડ, આધુનિક ટનલ અને એલિવેટેડ કોરિડોરના આ જાળથી દિલ્હીમાં લોજિસ્ટિક્સ કાર્યક્ષમતામાં ધરખમ સુધારો થશે. આનાથી માત્ર સ્થાનિક લોકોનો સમય જ નહીં બચે, પરંતુ દેશના આર્થિક હબ તરીકે દિલ્હી-NCR નો દબદબો પણ વધશે.

નિરીક્ષણ દરમિયાન કેન્દ્રીય મંત્રી હર્ષ મલ્હોત્રા, અજય તમટા અને કૃષ્ણ પાલ ગુર્જર સહિતના અનેક સાંસદો અને ધારાસભ્યો પણ હાજર રહ્યા હતા. સરકારના આ મહત્વાકાંક્ષી આયોજનથી સ્પષ્ટ થાય છે કે આગામી થોડા વર્ષોમાં દિલ્હી-NCR ની મુસાફરીનો અનુભવ સંપૂર્ણપણે બદલાઈ જશે અને તે સ્માર્ટ સિટી તરફનું એક મજબૂત કદમ બની રહેશે.