અયોધ્યા : ભવ્ય અને દિવ્ય અયોધ્યા રામ મંદિરના સંચાલન અને ભક્તોની સુવિધાઓને વધુ સુદ્રઢ બનાવવા માટે શ્રી રામ જન્મભૂમિ તીર્થ ક્ષેત્ર ટ્રસ્ટે એક મોટો વહીવટી નિર્ણય લીધો છે. ટ્રસ્ટના નવનિયુક્ત ચીફ એક્ઝિક્યુટિવ ઓફિસર (CEO) તરીકે ભૂતપૂર્વ એર માર્શલ જિતેન્દ્ર મિશ્રાની નિમણૂક બાદ હવે ટૂંક સમયમાં જ એક જોઈન્ટ એક્ઝિક્યુટિવ ઓફિસર (ડેપ્યુટી CEO)ની પણ નિમણૂક કરવામાં આવશે. રામ મંદિર ટ્રસ્ટના નવા જનરલ સેક્રેટરી મહંત ગોવિંદ દેવ ગિરીએ પોતાના પ્રથમ અધિકૃત નિવેદનમાં આ મહત્વની માહિતી શેર કરી છે.

પારદર્શક પ્રક્રિયા દ્વારા થશે ડેપ્યુટી CEOની પસંદગી

મહાસચિવ મહંત ગોવિંદ દેવ ગિરીએ જણાવ્યું હતું કે સર્ચ કમિટીએ ખૂબ જ મહેનત અને પારદર્શક પ્રક્રિયા દ્વારા યોગ્ય ઉમેદવારોની એક પેનલ તૈયાર કરી છે, જેમાંથી જ જરૂરિયાત મુજબ ડેપ્યુટી CEOની પસંદગી કરવામાં આવશે. તેમણે સર્ચ કમિટીના સભ્યો—જસ્ટિસ પ્રમોદ કોહલી, લેફ્ટનંત જનરલ વિષ્ણુકાંત ચતુર્વેદી અને વિજ્ઞાની સુરેશ હાવડેનો વિશેષ આભાર માન્યો હતો. આ સાથે જ તેમણે નવનિયુક્ત ટ્રસ્ટી ડૉ. નિર્મલા યાદવનું સ્વાગત કરતા કહ્યું કે, "આદિશક્તિના રૂપમાં તેમના આગમનથી ટ્રસ્ટમાં એક નવી પૂર્ણતા આવી છે."

અયોધ્યાને 'વિશ્વની સાંસ્કૃતિક રાજધાની' બનાવવાનું લક્ષ્ય

ટ્રસ્ટના ભવિષ્યના રોડમેપ અંગે વાત કરતા મહાસચિવ ગોવિંદ દેવ ગિરીએ ઉમેર્યું હતું કે, "અમને સેવા માટે એક સુસજ્જ અને દિવ્ય મંદિર વારસામાં મળ્યું છે. હવે અમારું પ્રાથમિક લક્ષ્ય અયોધ્યાને વિશ્વની સાંસ્કૃતિક રાજધાની તરીકે સ્થાપિત કરવાનું છે. આ માટે રામ મંદિર પરિસરમાં ભક્તો માટેની સુવિધાઓમાં અભૂતપૂર્વ વધારો કરવામાં આવશે અને સમગ્ર સેવા પ્રણાલીને વિશ્વ સમક્ષ એક ઉત્કૃષ્ટ ઉદાહરણ તરીકે રજૂ કરાશે." તેમણે સ્પષ્ટ કર્યું કે ટ્રસ્ટના પ્રવક્તા માટે યોગ્ય નામની શોધ હજુ જારી હોવાથી તે નિર્ણય હાલ મુલતવી રખાયો છે.

નવા CEO જિતેન્દ્ર મિશ્રા અયોધ્યા પહોંચ્યા, રામલલ્લાના આશીર્વાદ લીધા

બીજી તરફ, પદ સંભાળ્યા બાદ પ્રથમ વખત અયોધ્યા પહોંચેલા નવા CEO જિતેન્દ્ર મિશ્રાનું એરપોર્ટ પર ઉષ્માભર્યું સ્વાગત કરાયું હતું. ત્યાંથી તેઓ સીધા તીર્થ ક્ષેત્ર ભવન ગયા અને ત્યારબાદ રામલલ્લાના દર્શન કરી આશીર્વાદ મેળવ્યા હતા. દર્શન બાદ તેમણે રામઘાટ સ્થિત વર્કશોપની મુલાકાત લીધી હતી, જ્યાં તેમણે મહાસચિવ ગોવિંદ દેવ ગિરી અને અન્ય વરિષ્ઠ અધિકારીઓ સાથે બેઠક યોજીને ભાવિ વ્યવસ્થાઓ અંગે ચર્ચા કરી હતી. નવો વહીવટી મોરચો સંભાળતાની સાથે જ રામ મંદિરના વિસ્તરણ, શ્રદ્ધાળુઓની સુવિધા અને સમગ્ર યાત્રાધામના વ્યવસ્થાપનને એક નવી ઊંચાઈ મળશે તે ચોક્કસ છે.