વોશિંગ્ટન, તા. ૩૦ :  અમેરિકાએ ૨૦૨૮થી અમલમાં આવનારા પાસપોર્ટની નવી રચના જાહેર  કરી છે, જેમાં રાષ્ટ્રીય ગરુડ અને ૨૫૦ વર્ષના ઇતિહાસને કેન્દ્રસ્થાને રાખવામાં આવ્યા છે.

અમેરિકાના વિદેશમંત્રી માર્કો રૂબિયોએ ‘ગરુડની ઉડાન’ની કલ્પના ઉપર તૈયાર કરાયેલ ૨૦૨૮નો નવો અમેરિકન પાસપોર્ટ રજૂ કર્યો છે. વિદેશ વિભાગ અને રાષ્ટ્રીય રચના કેન્દ્ર દ્વારા પાસપોર્ટના મુખપૃષ્ઠથી અંદરના દરેક પાના સુધી નવી રચના તૈયાર કરવામાં આવી છે.

પાસપોર્ટનો મૂળ વાદળી રંગ જાળવવામાં આવ્યો છે, પરંતુ અમેરિકાનું નામ રાષ્ટ્રીય મહોરની ઉપર મૂકવામાં આવ્યું છે. ગરુડવાળી મહોરને વધુ મોટી, સ્પષ્ટ અને સુવર્ણ બનાવવામાં આવી છે. અંદરના પાનાંઓમાં અમેરિકન ક્રાંતિ, પશ્ચિમ તરફની યાત્રા, રેલમાર્ગ, પ્રથમ ઉડાન, ઇવો જીમા ઉપર ધ્વજારોહણ અને ચંદ્રયાત્રા સુધીની ઐતિહાસિક ઝાંખી રજૂ થશે.

દરેક પાનાં ઉપર ગરુડની ક્રમશઃ બદલાતી આકૃતિ હશે. પાનાં ઝડપથી ફેરવતાં ગરુડ ઉડતું હોય તેવી દૃશ્ય અસર સર્જાશે. સુરક્ષાની કેટલીક વિશેષતાઓ ગુપ્ત રાખવામાં આવી છે. નવો પાસપોર્ટ સામાન્ય પરબીડિયાને બદલે વધુ સુઘડ અને સુરક્ષિત વિશિષ્ટ ડબ્બામાં મોકલવાની પણ યોજના છે.