નવી દિલ્હી, તા.૨૧: રાજધાની નવી દિલ્હીમાં કથિત NEET-UG 2026 પેપર લીકને લઈને વિરોધ દર્શાવી રહેલા વિદ્યાર્થીઓ અને પ્રદર્શનકારીઓ પર પોલીસ દળો દ્વારા કઠોર અને હિંસક કાર્યવાહી કરવામાં આવી હોવાના સોશિયલ મીડિયા પર વાયરલ થયેલા દાવાઓને કેન્દ્ર સરકારે સખત શબ્દોમાં ફગાવી દીધા છે.

ગઈકાલે નવી દિલ્હી ખાતે આયોજિત વિરોધ પ્રદર્શન દરમિયાન પોલીસે આંદોલનકારીઓ પર 'પેલેટ ગન' (Pellet Guns) નો ઉપયોગ કર્યો હોવાની તથા ખીલા લગાવેલા ડંડાઓ વડે લોકોને માર માર્યો હોવાની ઘણી ભ્રામક પોસ્ટ્સ સોશિયલ મીડિયા પ્લેટફોર્મ્સ પર વાયરલ થઈ હતી. આ દાવાઓને કારણે વાલીઓ અને વિદ્યાર્થીઓમાં ભારે ચિંતાનો માહોલ સર્જાયો હતો.

PIB ફેક્ટ ચેકે સત્ય સામે લાવ્યું

આ અફવાઓની ગંભીરતાને ધ્યાનમાં રાખીને, ભારત સરકારના પ્રેસ ઇન્ફર્મેશન બ્યુરો (PIB) ના 'ફેક્ટ ચેક યુનિટ' દ્વારા તાત્કાલિક તપાસ કરવામાં આવી હતી. તપાસ બાદ ફેક્ટ ચેક યુનિટે સ્પષ્ટતા કરી છે કે, સોશિયલ મીડિયા પર ચલાવવામાં આવી રહેલા આ તમામ દાવાઓ સંપૂર્ણપણે ખોટા, પાયાવિહોણા અને ફેક (Fake) છે. પ્રદર્શન દરમિયાન પોલીસ દ્વારા આવા કોઈ પણ ઘાતક હથિયાર કે નખ/ખીલાવાળા ડંડાનો ઉપયોગ કરવામાં આવ્યો નથી.

સરકારે નાગરિકો અને વિદ્યાર્થીઓને અપીલ કરી છે કે સોશિયલ મીડિયા પર વહેતી થતી આવી અફવાઓ પર વિશ્વાસ ન કરવો અને અધિકૃત માહિતી માટે સત્તાવાર સ્ત્રોતો પર જ આધાર રાખવો.