નવી દિલ્હી, તા.૨૪: નેશનલ બોર્ડ ઓફ એક્ઝામિનેશન્સ ઈન મેડિકલ સાયન્સ (NBEMS) દ્વારા નીટ પીજી (NEET PG 2026) પરીક્ષાનું પરિણામ અધિકૃત રીતે જાહેર કરી દેવામાં આવ્યું છે. આ પરીક્ષા આપ્યા બાદ દેશભરના હજારો મેડિકલ ઉમેદવારો જે પરિણામની આતુરતાથી રાહ જોઈ રહ્યા હતા, તેમનો ઈંતેજાર હવે પૂરો થયો છે. ઉમેદવારો હવે બોર્ડની સત્તાવાર વેબસાઇટ nbe.edu.in પર જઈને પોતાનું પરિણામ અને વિગતવાર સ્કોરકાર્ડ ચકાસી શકે છે.

NBEMS દ્વારા પરિણામની સાથે સાથે આ વર્ષનું સત્તાવાર કટ-ઓફ પણ જાહેર કરી દેવામાં આવ્યું છે. ઉમેદવારો પોતાની લોગિન વિગતો (ક્રેડેન્શિયલ્સ) દાખલ કરીને સરળતાથી પોતાનું સ્કોરકાર્ડ ડાઉનલોડ કરી શકશે. ભવિષ્યમાં કાઉન્સેલિંગ અને એડમિશન પ્રક્રિયા માટે ઉમેદવારોને આ સ્કોરકાર્ડની પ્રિન્ટ આઉટ સાચવી રાખવા સલાહ આપવામાં આવી છે.

૫ સરળ સ્ટેપમાં ડાઉનલોડ કરો તમારું સ્કોરકાર્ડ:

૧. સત્તાવાર વેબસાઇટ: સૌપ્રથમ NBEMS ની અધિકૃત વેબસાઈટ nbe.edu.in ની મુલાકાત લો.
૨. સેક્શન પસંદ કરો: હોમપેજ પર આપેલા 'NEET PG 2026' ટેબ પર ક્લિક કરો.
૩. પરિણામ લિંક: ત્યારબાદ સ્ક્રીન પર દેખાતી 'NEET PG 2026 Result' લિંક પર ક્લિક કરો.
૪. લોગિન વિગતો: તમારી નોંધણી વિગતો અને લોગિન ક્રેડેન્શિયલ્સ દર્જ કરી સબમિટ કરો.
૫. પ્રિન્ટ આઉટ: પરિણામ સ્ક્રીન પર દેખાય એટલે તેને ડાઉનલોડ કરી ભવિષ્યના સંદર્ભ માટે પ્રિન્ટ કાઢી લો.