નવી દિલ્હી:  દેશની સૌથી પ્રતિષ્ઠિત મેડિકલ પ્રવેશ પરીક્ષા NEETમાં થયેલા પેપર લીક મામલે બુધવારે યોજાયેલી સંસદીય સ્થાયી સમિતિની બેઠક રાજકીય અખાડામાં ફેરવાઈ ગઈ હતી. વિપક્ષી સાંસદોએ સરકાર પર પ્રહારો કરતા સવાલ કર્યો હતો કે, જે પરીક્ષા પ્રણાલી ડિજિટલ અને લોખંડી સુરક્ષાના દાવા કરે છે, તેમાં આટલું મોટું ગાબડું કેવી રીતે પડ્યું? બેઠકમાં ગરમાગરમી એટલી વધી ગઈ હતી કે વિપક્ષે આને માત્ર વહીવટી ભૂલ નહીં, પણ સિસ્ટમની સંપૂર્ણ નિષ્ફળતા ગણાવી હતી. તેઓએ સ્પષ્ટ માંગ કરી હતી કે માત્ર તપાસના નામે સમય પસાર કરવાને બદલે જવાબદાર ઉચ્ચ અધિકારીઓની જવાબદારી નક્કી કરવામાં આવે.

આ હોબાળા વચ્ચે હાજર રહેલા સરકારી અધિકારીઓએ બચાવ કરતા જણાવ્યું કે, આ સમગ્ર કૌભાંડની તપાસ હાલ સેન્ટ્રલ બ્યુરો ઓફ ઇન્વેસ્ટિગેશન (CBI) દ્વારા કરવામાં આવી રહી છે અને અનેક સ્તરે તપાસ પ્રક્રિયા તેજ છે. બેઠક દરમિયાન કે. રાધાકૃષ્ણન સમિતિના અહેવાલ પર પણ વિસ્તૃત ચર્ચા થઈ હતી, જેમાં પ્રશ્નપત્રોની સુરક્ષા, ડિજિટલ દેખરેખ અને પરીક્ષા કેન્દ્રોના કડક મોનિટરિંગ માટે સૂચનો આપવામાં આવ્યા છે. અધિકારીઓએ કબૂલાત કરી હતી કે સિસ્ટમમાં કેટલીક ટેકનિકલ નબળાઈઓ છે, જેને દૂર કરવા માટે યુદ્ધના ધોરણે સુધારાત્મક પગલાં લેવામાં આવી રહ્યા છે.

વિપક્ષી સભ્યોએ ભારપૂર્વક જણાવ્યું હતું કે, વારંવાર પેપર લીક થવાની ઘટનાઓથી દેશના તેજસ્વી વિદ્યાર્થીઓનો આત્મવિશ્વાસ ડગમગી રહ્યો છે. તેઓએ સૂચન કર્યું કે ભવિષ્યમાં આવી ઘટનાઓ રોકવા માટે કોઈ કાયમી અને અત્યાધુનિક સુરક્ષા મોડલ હોવું જોઈએ, જે માનવીય હસ્તક્ષેપ વગર કામ કરે. બેઠકના અંતે, સરકારે ખાતરી આપી હતી કે સુરક્ષા પ્રોટોકોલને વધુ કડક બનાવવામાં આવશે અને સમિતિને તપાસની પ્રગતિ અંગે નિયમિતપણે જાણ કરવામાં આવશે. જોકે, જવાબદારી કોની છે તે પ્રશ્ન હજુ પણ હવામાં લટકી રહ્યો છે.