મુંબઈ, તા.૧૦: મહારાષ્ટ્રના મુખ્યમંત્રી દેવેન્દ્ર ફડણવીસે મંગળવારે મુંબઈમાં પોતાના સત્તાવાર નિવાસસ્થાને દિવાળી મિલન સમારોહ દરમિયાન નેશનાલિસ્ટ કોંગ્રેસ પાર્ટી (NCP) ના બંને જૂથો વચ્ચેના સંભવિત વિલીનીકરણ અંગે ચાલી રહેલી રાજકીય અટકળો પર મોટું નિવેદન આપ્યું છે.

પ્રાપ્ત વિગતો અનુસાર, મુખ્યમંત્રી ફડણવીસે સ્પષ્ટ શબ્દોમાં જણાવ્યું છે કે જો શરદ પવાર અને સુનેત્રા પવાર જૂથ દ્વારા વિલીનીકરણ કરવાનો કોઈ નિર્ણય લેવામાં આવે તો તેમને ભાજપનો સંપર્ક કરવો પડશે, કારણ કે ભાજપના સમર્થન વિના આ વિલીનીકરણ શક્ય નથી અને અત્યાર સુધી કોઈપણ પક્ષે આ અંગે કોઈ ચર્ચા કરી નથી.

આ અટકળો ત્યારે શરૂ થઈ જ્યારે પ્રફુલ્લ પટેલ અને શરદ પવાર વચ્ચે મુલાકાત થઈ હતી અને તાજેતરમાં પાર્થ પવાર સહિતના અગ્રણી નેતાઓએ શરદ પવારના નિવાસસ્થાને લગભગ દોઢ કલાક સુધી બેઠક યોજી હતી, જેના કારણે રાજકીય વર્તુળોમાં ગરમાવો આવી ગયો છે.

સુનેત્રા પવારના નેતૃત્વ વિશે વાત કરતા મુખ્યમંત્રીએ જણાવ્યું કે તેઓ પરિસ્થિતિ મુજબ ખુદને ઢાળી રહ્યા છે, જોકે અજિત પવારના દાયકાઓૂના રાજકીય અનુભવ સાથે તેમની સરખામણી કરવી યોગ્ય નથી, અને મહાયુતિ ગઠબંધનમાં વરિષ્ઠ નેતાઓ પક્ષના સંચાલનમાં સક્રિય ભૂમિકા ભજવી રહ્યા છે.

આ અગાઉ વિમાન દુર્ઘટનામાં અજિત પવારના નિધન બાદ સુનેત્રા પવારે પક્ષના પ્રમુખ તરીકે જવાબદારી સંભાળી હતી અને મહાયુતિ સરકારમાં નાયબ મુખ્યમંત્રી પદ સંભાળ્યું હતું, જેમાં ભાજપ અને શિવસેના પણ સહયોગી તરીકે સામેલ છે.

આગામી સમયમાં મહારાષ્ટ્રના રાજકારણમાં એનસીપીના બંને જૂથો એકસાથે આવશે કે કેમ અને ભાજપ સાથે આ અંગે કોઈ ઔપચારિક બેઠક યોજાશે કે કેમ, તે તો આગામી દિવસોમાં જ સ્પષ્ટ થશે પરંતુ આ નિવેદને રાજકીય ચર્ચાઓને વધુ તેજ બનાવી દીધી છે.