જયપુર: રાજસ્થાનના ઝાલાવાડ વિસ્તારમાં આવેલા નયા તાલાબ રોડ પર એક અત્યંત ભયાનક અકસ્માત સર્જાયો હતો. પ્રાપ્ત થતી માહિતી અનુસાર વીજળીના થાંભલાઓ ભરેલા એક ટ્રેક્ટરના ચાલકે અચાનક સ્ટેયરિંગ પરનો કાબૂ ગુમાવી દેતા તે બેકાબુ ટ્રેક્ટર સીધું જ રસ્તાની બાજુમાં આવેલી એક દુકાનમાં ઘૂસી ગયું હતું. આ ગમખ્વાર દુર્ઘટનામાં દુકાન પાસે ઉભેલા બે માસૂમ બાળકો અત્યંત ગંભીર રીતે ઈજાગ્રસ્ત થયા હતા. અકસ્માત થતા જ આસપાસના લોકો દોડી આવ્યા હતા અને બંને બાળકોને સારવાર માટે તાત્કાલિક ધોરણે નજીકની હોસ્પિટલમાં ખસેડાયા હતા. આ સમગ્ર અકસ્માતની હચમચાવી દેતી ઘટના ત્યાં લાગેલા સીસીટીવી કેમેરામાં સ્પષ્ટ રીતે કેદ થઈ ગઈ છે. બનાવની જાણ થતા જ પોલીસે તાકીદે ઘટનાસ્થળે પહોંચીને સીસીટીવી ફૂટેજના આધારે વધુ તપાસ હાથ ધરી છે.