નવી દિલ્હી : ઉત્તર ભારતમાં જ્યારે સૂર્યનારાયણ પોતાનો પ્રકોપ વરસાવી રહ્યા છે, ત્યારે દિલ્હી અને તેની આસપાસના NCR વિસ્તારો માટે રાહતના સમાચાર આવ્યા છે. ભારતીય હવામાન વિભાગ (IMD) એ આગાહી કરી છે કે દિલ્હીમાં આગામી બે દિવસ સુધી વરસાદી માહોલ જોવા મળશે. આ બદલાતા હવામાનને પગલે વિભાગ દ્વારા ‘યલો એલર્ટ’ પણ જાહેર કરવામાં આવ્યું છે.
વેસ્ટર્ન ડિસ્ટર્બન્સની કમાલ
હવામાન નિષ્ણાતોના જણાવ્યા અનુસાર, એક નવું ‘વેસ્ટર્ન ડિસ્ટર્બન્સ’ (પશ્ચિમી વિક્ષોભ) સક્રિય થઈ રહ્યું છે, જેની સીધી અસર દિલ્હી-NCRના વાતાવરણ પર પડશે. આ સિસ્ટમના કારણે આકરી ગરમીમાં અચાનક પલટો આવશે અને ધૂળની ડમરીઓ સાથે હળવોથી મધ્યમ વરસાદ પડી શકે છે. આ ફેરફારને કારણે લોકોને ‘જેઠ’ મહિનાની આકરી ગરમીમાંથી થોડા દિવસો માટે મુક્તિ મળશે.
તાપમાનમાં થશે ઘટાડો
છેલ્લા કેટલાક દિવસોથી દિલ્હીમાં તાપમાનનો પારો ૪૦ ડિગ્રીને પાર કરી રહ્યો હતો, પરંતુ હવે વરસાદી ઝાપટાંને કારણે મહત્તમ તાપમાનમાં ૩ થી ૪ ડિગ્રીનો ઘટાડો નોંધાય તેવી શક્યતા છે. પવનની ગતિ પણ ૩૦ થી ૪૦ કિલોમીટર પ્રતિ કલાક રહેવાનું અનુમાન છે, જેનાથી બફારામાં ઘટાડો થશે અને વાતાવરણ ખુશનુમા બનશે.
વીકએન્ડ બનશે મજેદાર
રજાના દિવસોમાં જ વરસાદની આ આગાહી આવતા દિલ્હીવાસીઓમાં ખુશીનો માહોલ છે. ગરમીથી કંટાળેલા લોકો હવે વીકએન્ડમાં ઠંડા વાતાવરણનો આનંદ માણી શકશે. જોકે, હવામાન વિભાગે લોકોને ગાજવીજ અને પવન દરમિયાન સાવચેત રહેવા અને ઘરની બહાર નીકળતી વખતે હવામાનની અપડેટ લેતા રહેવા સૂચના આપી છે.