અમદાવાદ : સમગ્ર દેશમાં લાંબા સમયથી પ્રવર્તી રહેલી અસહ્ય અને ભીષણ ગરમીમાંથી લોકોને મુક્તિ મળવાના સંકેતો તો દેખાઈ રહ્યા છે, પરંતુ તેની સાથે જ કુદરતી આફતનું એક મોટું સંકટ પણ તોળાઈ રહ્યું છે. ભારતીય હવામાન વિભાગ (IMD) દ્વારા જારી કરવામાં આવેલા તાજેતરના અતિ મહત્વના એલર્ટ મુજબ, આવતીકાલે એટલે કે ૨૬ જૂનના રોજ ઉત્તર પ્રદેશ, બિહાર અને દિલ્હી સહિત દેશના ૨૧ રાજ્યોમાં કુદરતનો પ્રકોપ જોવા મળી શકે છે. આ વિસ્તારોમાં ભારેથી અતિભારે વરસાદની સાથે ભયાનક વાવાઝોડું આવવાની ગંભીર ચેતવણી આપવામાં આવી છે.

૮૦ કિમીની ઝડપે ફૂંકાશે તોફાની પવન, પાકને નુકસાનની ભીતિ

હવામાન વૈજ્ઞાનિકોની આગાહી અનુસાર, આ સમયગાળા દરમિયાન વાવાઝોડાની તીવ્રતા અત્યંત ઘાતક સ્તરે પહોંચી શકે છે. પવનની ગતિ ૮૦ કિલોમીટર પ્રતિ કલાકની ઝડપ પકડી શકે છે, જેના કારણે ખેડૂતોના ઊભા પાકને વ્યાપક નુકસાન થવાની પૂરી આશંકા છે. વહીવટી તંત્ર દ્વારા લોકોને અત્યંત સાવચેત રહેવા, તેમજ જંગલી વિસ્તારો કે ખુલ્લા ખેતરોમાં જવાનું ટાળવા સખત અપીલ કરવામાં આવી છે. ખાસ કરીને પૂર્વીય રાજ્યોમાં વીજળી પડવાની સંભાવના વધુ હોવાથી સાવધ રહેવું અનિવાર્ય બન્યું છે. દેશના જે ૨૧ રાજ્યોને હાઈ એલર્ટ પર રાખવામાં આવ્યા છે તેમાં ઉત્તર પ્રદેશ, દિલ્હી, પંજાબ, હરિયાણા, રાજસ્થાન, બિહાર, ઝારખંડ, મધ્ય પ્રદેશ, મહારાષ્ટ્ર અને દક્ષિણ ભારતના રાજ્યોનો સમાવેશ થાય છે.

મુખ્ય શહેરોમાં કુદરતી માહોલ કેવો રહેશે?

·         દિલ્હી-NCR: દેશની રાજધાની દિલ્હીમાં તેજ આંધી અને હળવા વરસાદની શક્યતા છે. અહીં મહત્તમ તાપમાન ૩૮ ડિગ્રી અને લઘુતમ તાપમાન ૩૦ ડિગ્રી સેલ્સિયસ આસપાસ નોંધાઈ શકે છે.

·         ઉત્તર પ્રદેશ: નોઈડા, મેરઠ, કાનપુર અને લખનઉ જેવા મોટા શહેરોમાં 'યલો એલર્ટ' જાહેર કરાયું છે. અહીં ૭૦ થી ૮૦ કિમીની ઝડપે પવન ફૂંકાશે.

·         બિહાર અને ઝારખંડ: પટના, ગયા, રાંચી અને ધનબાદ સહિતના જિલ્લાઓમાં ૬૦ થી ૬૫ કિમીની સ્પીડે ફૂંકાતા પવન સાથે મુસળધાર વરસાદની આશંકા છે.

·         રાજસ્થાન: જયપુર, જોધપુર અને બીકાનેરમાં પણ ભારે ગાજવીજ સાથે ધૂળની ડમરીઓ અને વરસાદનું સામ્રાજ્ય રહેશે.

ગુજરાતના આ ૯ જિલ્લાઓમાં મેઘરાજા કરશે ધમાકેદાર બેટિંગ

ગુજરાતના હવામાનની વાત કરીએ તો, આવતીકાલે રાજ્યના ખાસ કરીને સૌરાષ્ટ્ર અને દક્ષિણ ગુજરાતના ભાગોમાં વરસાદી માહોલ જામશે. ગીર સોમનાથ, અમરેલી, ભાવનગર, નર્મદા, તાપી, સુરત, નવસારી, વલસાડ અને ડાંગ જિલ્લામાં છૂટાછવાયા સ્થળોએ હળવોથી મધ્યમ તેમજ કેટલાક વિસ્તારોમાં ભારે વરસાદ ખાબકી શકે છે. ગીર સોમનાથમાં તો પવનની ગતિ ૮૭ કિમી સુધી પહોંચવાનું પણ અનુમાન છે.

મુસાફરો અને પ્રવાસીઓ માટે ખાસ એડવાઈઝરી

હવામાન વિભાગે પહાડી અને દરિયાઈ વિસ્તારોમાં ફરવા જવા ઈચ્છતા પ્રવાસીઓને ખાસ સૂચના આપી છે કે તેઓ પ્રવાસ શરૂ કરતા પહેલા સ્થાનિક તંત્રની ગાઈડલાઈન ચોક્કસ તપાસી લે. વાવાઝોડાના કારણે મોટા વૃક્ષો અને વીજળીના થાંભલા ધરાશાયી થવાનો ખતરો હોવાથી કાચના મકાનો કે નબળા બાંધકામોથી દૂર રહીને સુરક્ષિત આશ્રયસ્થાનોમાં આશરો લેવા જણાવાયું છે.