નવી દિલ્હી:સમગ્ર દેશમાં હાલ કુદરતનો અજીબ મિજાજ જોવા મળી રહ્યો છે, જ્યાં એક તરફ સૂર્યદેવ આકરી ગરમી વરસાવી રહ્યા છે તો બીજી તરફ અનેક રાજ્યોમાં ભારે વરસાદ અને વાવાઝોડાની ગંભીર ચેતવણી જારી કરવામાં આવી છે. હવામાન વિભાગના જણાવ્યા અનુસાર, હાલમાં દેશના વિવિધ ભાગોમાં એકસાથે ત્રણ હવામાન પ્રણાલીઓ સક્રિય થઈ છે. ઉત્તર પ્રદેશથી રાજસ્થાન સુધી એક ટ્રફ લાઇન ફેલાયેલી છે, જ્યારે દક્ષિણ ભારતમાં કર્ણાટકથી કોમોરિન પ્રદેશ સુધી અન્ય એક સિસ્ટમ આકાર લઈ રહી છે. આ ભૌગોલિક ફેરફારોને કારણે આગામી ૨૫ થી ૩૦ એપ્રિલ દરમિયાન જમ્મુ-કાશ્મીર, લદ્દાખ અને હિમાચલ પ્રદેશ જેવા પહાડી વિસ્તારોમાં હળવાથી મધ્યમ વરસાદ સાથે હિમવર્ષા થવાની પ્રબળ શક્યતા છે, જેની અસર મેદાની રાજ્યોમાં પણ જોવા મળશે.

મેદાની વિસ્તારોની વાત કરીએ તો પંજાબ, હરિયાણા, ચંદીગઢ અને ઉત્તર પ્રદેશમાં ૨૭ એપ્રિલથી ૧ મે દરમિયાન તેજ પવન સાથે વરસાદી માહોલ જામશે. ખાસ કરીને રાજસ્થાન અને મધ્ય પ્રદેશમાં વાવાઝોડાની શક્યતાને પગલે ખેડૂતોમાં ચિંતા ફેલાઈ છે. પૂર્વોત્તર ભારતના રાજ્યો જેવા કે આસામ, મેઘાલય અને અરુણાચલ પ્રદેશમાં તો 'ખૂબ જ ભારે વરસાદ'ની આગાહી કરવામાં આવી છે. આ વિસ્તારોમાં ૨૬ અને ૨૭ એપ્રિલે ભારે પવન ફૂંકાવા ઉપરાંત ઝારખંડ અને સિક્કિમમાં કરા પડવાની પણ સંભાવના છે. પશ્ચિમ બંગાળ અને ઓડિશામાં પણ વાતાવરણ પલટાતા ઉકળાટમાંથી થોડી રાહત મળવાની આશા છે, પરંતુ વાવાઝોડાના જોખમે તંત્રને સતર્ક કરી દીધું છે.

દક્ષિણ ભારતના રાજ્યોમાં પણ મેઘરાજાની એન્ટ્રી થવાની તૈયારી છે, જેમાં તમિલનાડુ, કેરળ, કર્ણાટક અને તેલંગાણામાં વીજળીના કડાકા સાથે વરસાદ પડી શકે છે. જોકે, આ વરસાદી ચેતવણી વચ્ચે પણ ગરમીનો પ્રકોપ શમવાનું નામ નથી લઈ રહ્યો. દિલ્હી, હરિયાણા અને પંજાબમાં ૨૭ એપ્રિલ સુધી હીટવેવ એટલે કે ગરમીનું મોજું યથાવત રહેવાની શક્યતા છે. આમ, દેશના નાગરિકોએ એક તરફ લૂ અને આકરા તાપથી બચવાનું છે તો બીજી તરફ અચાનક આવનારા વાવાઝોડા અને વરસાદ સામે પણ સાવચેતી રાખવાની છે. હવામાન વિભાગે લોકોને બિનજરૂરી બહાર ન નીકળવા અને આકાશી વીજળીથી બચવા માટે સુરક્ષિત સ્થળોએ રહેવાની સલાહ આપી છે.