નવી દિલ્હી : દેશમાં દિવસેને દિવસે વકરી રહેલી મોંઘવારી, બેરોજગારી, આર્થિક અસમાનતા અને બંધારણીય મૂલ્યો પર થઈ રહેલા કથિત આક્રમણોને મુદ્દે કેન્દ્ર સરકાર સામે દેશવ્યાપી મોરચો ખોલવાની કમર કસી લેવામાં આવી છે. કોમ્યુનિસ્ટ પાર્ટી ઓફ ઈન્ડિયા (CPI) દ્વારા આગામી ૧ સપ્ટેમ્બરના રોજ દેશની રાજધાની દિલ્હીના ઐતિહાસિક રામલીલા મેદાન ખાતે 'બદલાવ જરૂરી હૈ' શીર્ષક હેઠળ એક વિરાટ રાષ્ટ્રીય રેલીનું આયોજન કરવામાં આવ્યું છે. આ આયોજન આખા દેશમાં ચાલી રહેલા જનજાગૃતિ અભિયાનની પૂર્ણાહુતિ રૂપે યોજાશે, જેમાં સમગ્ર ભારતમાંથી હજારોની સંખ્યામાં કામદારો, ખેડૂતો, યુવાનો અને મહિલાઓ ભાગ લેવા પહોંચશે.

નવી દિલ્હી ખાતે યોજાયેલી પત્રકાર પરિષદને સંબોધતા સીપીઆઈના જનરલ સેક્રેટરી ડી. રાજાએ કેન્દ્રની નરેન્દ્ર મોદી સરકાર પર આકરા પ્રહારો કર્યા હતા. તેમણે જણાવ્યું હતું કે વર્તમાન સમયમાં દેશ આર્થિક, સામાજિક અને રાજકીય સ્તરે ઊંડા સંકટમાંથી પસાર થઈ રહ્યો છે, પરંતુ કેન્દ્ર સરકાર પાસે આ સમસ્યાઓના ઉકેલ માટે ન તો કોઈ ઈચ્છાશક્તિ છે કે ન તો ક્ષમતા. સામાન્ય જનતા વધી રહેલા જીવનનિર્વાહના ખર્ચ વચ્ચે પીસાઈ રહી છે. દેશમાં રોજગારીની તકો નહિવત બરાબર થઈ ગઈ છે અને લોકોની ખરીદશક્તિ સતત ઘટી રહી છે, જેના કારણે ગરીબ અને મધ્યમ વર્ગ માટે દૈનિક જીવન ગુજારવું અત્યંત મુશ્કેલ બની ગયું છે.

પાર્ટીના મુખ્ય નેતાઓએ આરોપ લગાવ્યો હતો કે સરકારી શિક્ષણ અને આરોગ્ય સુવિધાઓને સતત નબળી પાડવામાં આવી રહી છે. દેશમાં ખેડૂતો આજે પણ પાકના લઘુત્તમ ટેકાના ભાવ (MSP)ની કાનૂની ગેરંટી માટે લડત આપી રહ્યા છે, જ્યારે મજૂરો અને શ્રમિકો તેમની સામાજિક સુરક્ષા ગુમાવી રહ્યા છે. આ ઉપરાંત, પેપર લીકની ઘટનાઓ સામે અવાજ ઉઠાવતા યુવાનો અને વિદ્યાર્થીઓ પર તંત્ર દ્વારા દમન ગુજારવામાં આવી રહ્યું હોવાનો દાવો પણ કરવામાં આવ્યો હતો. દલિતો, આદિવાસીઓ અને લઘુમતી સમાજના અધિકારોનું હનન થઈ રહ્યું છે અને આર્થિક અસમાનતા સતત વધી રહી છે.

કેન્દ્ર સરકારની રાજકીય નીતિઓ અંગે ગંભીર ચિંતા વ્યક્ત કરતાં ડી. રાજાએ ઉમેર્યું કે 'વન નેશન, વન ઈલેક્શન' અને સીમાંકન (Delimitation) જેવા નિર્ણયો ભારતની સંઘીય રચના (Federal System) પર મોટો ફટકો છે. સ્વાભિમાની લોકશાહી સંસ્થાઓ અને વિરોધ પક્ષોને નબળા પાડવા માટે વિવિધ સરકારી તપાસ એજન્સીઓનો દુરુપયોગ કરવામાં આવી રહ્યો હોવાનો આક્ષેપ પણ કરવામાં આવ્યો હતો. આ તમામ વાસ્તવિક મુદ્દાઓ પરથી દેશનું ધ્યાન ભટકાવવા માટે સંઘ-ભાજપ દ્વારા સાંપ્રદાયિક ધ્રુવીકરણનો આશરો લેવામાં આવી રહ્યો હોવાનું સીપીઆઈ નેતાગીરીએ ભારપૂર્વક જણાવ્યું હતું.

આ વિરોધ પ્રદર્શનને માત્ર એક પક્ષીય કાર્યક્રમ ન રાખતાં, લોકશાહી અને બંધારણના રક્ષણ માટે વિપક્ષી ગઠબંધન 'ઈન્ડિયા' (INDIA bloc) ના તમામ ઘટક પક્ષો અને બિન-સાંપ્રદાયિક દળોને પણ આ રેલીમાં જોડાવા ખુલ્લું આમંત્રણ આપવામાં આવ્યું છે. ઓગસ્ટ મહિનામાં દેશભરમાં આયોજિત પદયાત્રાઓ દ્વારા જનસંપર્ક સાધીને લોકોના પાયાના પ્રશ્નોને વાચા આપવાનું કામ કરવામાં આવ્યું હતું અને હવે સપ્ટેમ્બરની આ મહારેલી દ્વારા કેન્દ્ર સરકાર સામે એક મજબૂત રાજકીય વિકલ્પ ઊભો કરવાનો દાવો કરવામાં આવ્યો છે.