નાશિક: નાશિકની એક અદાલતે શનિવારે ટાટા કન્સલ્ટન્સી સર્વિસીસ (TCS) ની કર્મચારી અને મુખ્ય આરોપી નિદા ખાનની આગોતરા જામીન અરજી ફગાવી દીધી છે. આ કેસ નાશિક સ્થિત TCS યુનિટમાં મહિલા કર્મચારીઓની કથિત જાતીય સતામણી અને બળજબરીથી ધર્મ પરિવર્તન સાથે જોડાયેલો છે. પ્રાસિક્યુશને કોર્ટમાં ભારપૂર્વક જણાવ્યું હતું કે આ ગુનો અત્યંત ગંભીર છે અને કેસના મૂળ સુધી પહોંચવા માટે આરોપીની કસ્ટોડિયલ પૂછપરછ અનિવાર્ય છે. 
શું છે સમગ્ર વિવાદ?
નોંધાયેલી એફઆઈઆર (FIR) મુજબ, નિદા ખાન પર આરોપ છે કે તે મહિલા કર્મચારીઓને ઇસ્લામિક પરંપરાઓ મુજબ વસ્ત્રો પહેરવા અને તે મુજબ વર્તવા માટે દબાણ કરતી તેમજ સલાહ આપતી હતી. નિદા ખાને પોતાની ગર્ભાવસ્થાને ટાંકીને ધરપકડથી બચવા માટે જામીન માગ્યા હતા, પરંતુ કોર્ટે ગુનાની ગંભીરતાને જોતા તેને રાહત આપવાનો ઇનકાર કર્યો છે. હાલમાં મહારાષ્ટ્રના વિવિધ ભાગોમાં તેની શોધખોળ ચાલી રહી છે. 
SIT ની આકરી કાર્યવાહી
નાશિક પોલીસની સ્પેશિયલ ઇન્વેસ્ટિગેશન ટીમ (SIT) આ આઈટી કંપનીના યુનિટમાં મહિલા કર્મચારીઓની સતામણીના કુલ નવ કેસોની તપાસ કરી રહી છે. અત્યાર સુધીમાં પોલીસે નવ અલગ-અલગ એફઆઈઆર નોંધીને એક મહિલા ઓપરેશન્સ મેનેજર સહિત આઠ લોકોની ધરપકડ કરી છે. આરોપ છે કે પુરુષ સહકર્મીઓ દ્વારા મહિલાઓનું જાતીય શોષણ કરવામાં આવતું હતું. 
TCS ની પ્રતિક્રિયા
આ વિવાદ વકરતા ગયા મહિને TCS દ્વારા સત્તાવાર નિવેદન જારી કરવામાં આવ્યું હતું. કંપનીએ સ્પષ્ટ કર્યું હતું કે તેઓ કોઈપણ પ્રકારની સતામણી કે દબાણ સામે 'ઝીરો-ટોલરન્સ'ની નીતિ ધરાવે છે અને આ પ્રકારના કૃત્યો ચલાવી લેવામાં આવશે નહીં. કોર્ટના આ આકરા વલણ બાદ હવે પોલીસ તપાસમાં વધુ મોટા ખુલાસા થવાની શક્યતા છે.