કોલકાતા : કોલકાતાના નેતાજી સુભાષ ચંદ્ર બોઝ આંતરરાષ્ટ્રીય એરપોર્ટ પરિસરમાં આવેલી 130 વર્ષ જૂની ગૌરીપુર જામા મસ્જિદમાં બાંધકામના કામને કારણે શનિવારથી આગામી ત્રણ દિવસ માટે નમાજ અદા કરવા પર પ્રતિબંધ મૂકવામાં આવ્યો છે.

એરપોર્ટ સત્તાવાળાઓ દ્વારા રનવે નજીક ચાલી રહેલા બાંધકામના કારણે આ નિર્ણય લેવાયો છે. જોકે, આ મુદ્દો હવે રાજકીય વળાંક લઈ રહ્યો છે. ભાજપના ધારાસભ્ય સૌરવ સિકદારે સુરક્ષા જોખમોનો હવાલો આપીને એરપોર્ટ પરિસરમાં મસ્જિદની હાજરી સામે સવાલો ઉઠાવ્યા છે. તેમણે દાવો કર્યો છે કે નમાઝ માટે આવતા લોકો માટે બાયોમેટ્રિક પાસ કે બેકગ્રાઉન્ડ વેરિફિકેશનનો અભાવ એ એરપોર્ટની સુરક્ષા માટે મોટું જોખમ છે, ખાસ કરીને જ્યારે ત્યાં વીવીઆઈપીઓની અવરજવર રહેતી હોય.

બીજી તરફ, તૃણમૂલ કોંગ્રેસના નેતા સિદ્દીકુલ્લાહ ચૌધરીએ આ પ્રતિબંધનો વિરોધ કરતા જણાવ્યું હતું કે મસ્જિદ 135 વર્ષથી વધુ જૂની છે અને નમાજ પર રોક લગાવવાની કોઈ જરૂર નહોતી. તેમણે વધુમાં ઉમેર્યું કે આ મુદ્દા પર અધિકારીઓ સાથે ચર્ચા ચાલી રહી છે અને તેઓ કોઈપણ સૌહાર્દપૂર્ણ ઉકેલ લાવવા માટે તૈયાર છે.

આ ઘટના બાદ એરપોર્ટની સુરક્ષા વ્યવસ્થા અને જૂના ધાર્મિક સ્થાનોની જાળવણી વચ્ચેનો વિવાદ ચર્ચામાં આવ્યો છે. આગામી સમયમાં અધિકારીઓ સુરક્ષાના કડક પ્રોટોકોલ અને ધાર્મિક આસ્થાને ધ્યાનમાં રાખીને કોઈ મધ્યમ માર્ગ કાઢશે કે કેમ તે જોવું રહ્યું.