જિનીવા, તા.૦૫: વિશ્વ આરોગ્ય સંસ્થા (WHO) એ રવિવારે એક ચોંકાવનારો ખુલાસો કરતા જણાવ્યું છે કે એટલાન્ટિક મહાસાગરમાં સફર કરી રહેલા એક લક્ઝરી ક્રુઝ શિપમાં 'હંટાવાયરસ' (Hantavirus) નો ફેલાવો થયો છે. આ જીવલેણ વાયરસની ઝપેટમાં આવવાથી અત્યાર સુધીમાં ૩ મુસાફરોના કરુણ મોત નિપજ્યા છે, જ્યારે એક વ્યક્તિની હાલત ગંભીર હોવાથી તેને દક્ષિણ આફ્રિકાની હોસ્પિટલમાં આઈસીયુ (ICU) માં દાખલ કરવામાં આવ્યો છે.
જહાજમાં કુલ ૬ લોકો પ્રભાવિત
WHO દ્વારા સોશિયલ મીડિયા પ્લેટફોર્મ 'X' પર કરવામાં આવેલી પોસ્ટ મુજબ, આ ઘટનામાં કુલ ૬ લોકો સંક્રમિત થયા હતા. જોકે સત્તાવાર રીતે જહાજનું નામ જાહેર કરવામાં આવ્યું નથી, પરંતુ સૂત્રોના જણાવ્યા અનુસાર આ જહાજ 'MV Hondius' છે, જે આર્જેન્ટિનાથી કેપ વર્ડે તરફ જઈ રહ્યું હતું. મૃતકોમાં બે ડચ (નેધરલેન્ડ) નાગરિકો હોવાની પુષ્ટિ થઈ છે, જ્યારે એક બ્રિટિશ પ્રવાસી દક્ષિણ આફ્રિકામાં સારવાર હેઠળ છે.
શું છે આ હંટાવાયરસ?
હંટાવાયરસ એ ઉંદર અને ખિસકોલી જેવા પ્રાણીઓ દ્વારા ફેલાતો એક ગંભીર વાયરસ છે. તેના સંપર્કમાં આવવાથી ફેફસાં અને કિડનીને લગતી ગંભીર બીમારીઓ થઈ શકે છે. ક્રુઝ શિપમાં આ વાયરસ કેવી રીતે પહોંચ્યો તે અત્યારે તપાસનો વિષય છે. WHO હાલમાં સભ્ય દેશો અને જહાજ ઓપરેટરો સાથે તાલમેલ સાધીને અન્ય બીમાર મુસાફરોને એરલિફ્ટ કરવાની અને જહાજ પરના અન્ય લોકોના સ્વાસ્થ્યની તપાસ કરવાની કામગીરી કરી રહ્યું છે.
બ્રિટન અને દક્ષિણ આફ્રિકા સરકાર સતર્ક
બ્રિટનના વિદેશ વિભાગે જણાવ્યું છે કે તેઓ આ પરિસ્થિતિ પર બારીકાઈથી નજર રાખી રહ્યા છે અને ક્રુઝ કંપની તેમજ સ્થાનિક સત્તાવાળાઓ સાથે સતત સંપર્કમાં છે. દક્ષિણ આફ્રિકાના સ્વાસ્થ્ય વિભાગે પણ હોસ્પિટલમાં દાખલ મુસાફરને લઈને હાઈ એલર્ટ જાહેર કર્યું છે. આ ઘટનાને પગલે એટલાન્ટિકના દરિયાઈ પ્રવાસમાં મુસાફરોની સુરક્ષા અને આરોગ્યની તપાસ અંગે ગંભીર સવાલો ઉભા થયા છે. જહાજ પરના બાકીના મુસાફરોમાં પણ ભારે ગભરાટનો માહોલ જોવા મળી રહ્યો છે.