સોનભદ્ર : રવિવારે સવારે સોનભદ્રના ચોપન પોલીસ સ્ટેશન વિસ્તારની માર્કુંડી ખીણમાંથી બિછી ગામના ૨૨ વર્ષીય રાહુલ યાદવ અને સલખાન ગામની ૧૯ વર્ષીય ચંદા યાદવના મૃતદેહ શંકાસ્પદ હાલતમાં મળી આવતા સમગ્ર પંથકમાં સનસનાટી ફેલાઈ ગઈ છે.

રવિવારે સવારે ચોપન પોલીસ સ્ટેશન વિસ્તારમાં માર્કુંડી ખીણમાં એક નવપરિણીત યુગલના મૃતદેહ શંકાસ્પદ પરિસ્થિતિમાં મળી આવ્યા હતા. ઘટનાસ્થળેથી તેમની બાઇક પણ મળી આવી હતી. બાઇકને કોઈ નુકસાન થયું ન હતું. બંને મૃતદેહ ત્રણથી ચાર દિવસ જૂના હોવાનું જણાય છે. બિછી ગામના રહેવાસી રાહુલ યાદવના લગ્ન આ વર્ષે ૫ મેના રોજ સાલખાનની ચંદા યાદવ સાથે થયા હતા.

મૃતકના સંબંધીઓએ આ ઘટનામાં હત્યાની શંકા વ્યક્ત કરી છે. હાલ પોલીસ અને ફોરેન્સિક ટીમ દ્વારા ઘટનાસ્થળે તપાસ હાથ ધરીને પુરાવા એકત્રિત કરવામાં આવી રહ્યા છે. સ્થાનિક પોલીસ સ્ટેશનની ટીમ ઘટનાની ગંભીરતાને ધ્યાનમાં રાખીને સઘન તપાસ કરી રહી છે.

આ દુર્ઘટના પાછળનું ચોક્કસ કારણ પોસ્ટમોર્ટમ રિપોર્ટ બાદ જ સ્પષ્ટ થશે. પોલીસ દ્વારા હાલમાં આસપાસના વિસ્તારમાં પૂછપરછ કરવામાં આવી રહી છે અને હત્યા કે અન્ય કોઈ પાસા પર તપાસના ચક્રો ગતિમાન કર્યા છે, જેથી દોષિતોને વહેલી તકે પકડી શકાય.