નવી દિલ્હી : કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ બુધવારે ઈથેનોલ-મિશ્રણ કાર્યક્રમ (E20 ઇંધણ) ને લઈને ઉઠેલા વિવાદો પર મૌન તોડ્યું છે. એક વિશિષ્ટ ઈન્ટરવ્યુમાં તેમણે સ્પષ્ટ કર્યું છે કે ઈથેનોલ નીતિમાં તેમને કોઈ અંગત આર્થિક ફાયદો નથી. પોતાના પર લાગતા 'હિતોના સંઘર્ષ' (Conflict of Interest) ના આરોપોને નકારી કાઢતા ગડકરીએ જણાવ્યું કે, ઈથેનોલ ઉત્પાદનમાં તેમનો હિસ્સો માત્ર ૦.૦૭ ટકા જેટલો નજીવો છે, જે કોઈપણ આર્થિક લાભ માટે અપૂરતો છે. તેમના પરિવારનો ખાંડનો વ્યવસાય તો આ નીતિના ઘણા વર્ષો પહેલાથી અસ્તિત્વમાં છે.

ગડકરીએ ટીકાકારોને આકરા હાથે લેતા પડકાર ફેંક્યો કે, જો ઈથેનોલના કારણે કોઈના વાહનને નુકસાન થયું હોય, તો તેઓ તેના પુરાવા રજૂ કરે. તેમણે કહ્યું કે, મારુતિ સુઝુકી, ટોયોટા, ટાટા અને મહિન્દ્રા જેવી અગ્રણી વાહન ઉત્પાદક કંપનીઓ પાસે પણ આવી કોઈ ફરિયાદો નોંધાઈ નથી. ટોયોટાના એક તાજેતરના કિસ્સાનો ઉલ્લેખ કરતા તેમણે જણાવ્યું કે, વાહનમાં ખામી ઈથેનોલને કારણે નહીં, પરંતુ તેમાં પાણીના દૂષણને કારણે સર્જાઈ હતી. ઈથેનોલ મિશ્રણનો નિર્ણય એકલા ગડકરીનો નથી, પરંતુ પેટ્રોલિયમ મંત્રાલય, મંત્રીમંડળ અને વૈજ્ઞાનિક સંશોધનો બાદ લેવાયેલો સામૂહિક નિર્ણય છે.

આયાત ઘટશે, ખેડૂતોની આવક વધશે

ગડકરીએ ભારપૂર્વક જણાવ્યું કે ઈથેનોલ કાર્યક્રમનો મુખ્ય ઉદ્દેશ્ય દેશની ક્રૂડ ઓઈલની આયાત પરની નિર્ભરતા ઘટાડવાનો અને ભારતના ખેડૂતોની આવકમાં વધારો કરવાનો છે. તેમણે કહ્યું કે, "હું માત્ર ઈથેનોલની જ નહીં, પરંતુ વૈકલ્પિક ઈંધણની હિમાયત કરું છું. અમેરિકા, બ્રાઝિલ, જાપાન અને જર્મની જેવા વિકસિત દેશો પણ વર્ષોથી ઈથેનોલનો સફળતાપૂર્વક ઉપયોગ કરી રહ્યા છે, ત્યારે ભારત પણ વૈશ્વિક પ્રથાઓને અનુસરીને આધુનિક દિશામાં આગળ વધી રહ્યું છે."

આ સમગ્ર વિવાદને ગડકરીએ 'રાજકીય રીતે પ્રેરિત' ગણાવ્યો છે. તેમનું માનવું છે કે ઈથેનોલ કાર્યક્રમને જાણીજોઈને બદનામ કરવાનો પ્રયાસ થઈ રહ્યો છે. વાહન માલિકો માટે સ્પષ્ટ સંદેશ આપતા તેમણે કહ્યું કે, જો કોઈ પણ નાગરિકને ઈથેનોલથી પોતાના વાહનને નુકસાન થયું હોવાની શંકા હોય, તો તેઓ ડીલર કે મંત્રાલયમાં ફરિયાદ કરી શકે છે. સરકાર આ અંગે તપાસ કરીને યોગ્ય રાહત આપવા તૈયાર છે. અંતમાં તેમણે વિશ્વાસ વ્યક્ત કર્યો કે E20 ઇંધણ લાંબા ગાળે પર્યાવરણ અને અર્થતંત્ર બંને માટે હિતકારી સાબિત થશે.