નવી મુંબઈ, તા.૧૩: મુંબઈ-પુણે નેશનલ હાઈવે (NH-48) પર આજે વહેલી સવારે એક ભયાનક અકસ્માત સર્જાયો હતો. મુરબાડથી જેજુરી જઈ રહેલા શ્રદ્ધાળુઓની એક ફોર્સ મિની બસ ખોપોલી નજીક HOC બ્રિજ પાસે પલટી જતાં આઠ શ્રદ્ધાળુઓ ગંભીર રીતે ઘાયલ થયા છે. સવારે અંદાજે ૮:૧૫ વાગ્યે બનેલી આ ઘટનાને પગલે હાઈવે પર ટ્રાફિક જામના દ્રશ્યો સર્જાયા હતા અને આસપાસના લોકો દોડી આવ્યા હતા.

ઉતાર પર કાબુ ગુમાવતા સર્જાયો અકસ્માત

મુરબાડના શેલ્કે પાડાથી ભક્તો ભરેલી બસ (MH-06-BW-4030) જ્યારે જેજુરી તરફ જઈ રહી હતી, ત્યારે ખોપોલી નજીક એક તીવ્ર વળાંક અને ઉતાર પર ડ્રાઈવર ભરત રમેશ શેલ્કેએ અચાનક વાહન પરનો કાબુ ગુમાવી દીધો હતો. કાબુ ગુમાવતા જ બસ રોડ પર પલટી ખાઈ ગઈ હતી. અકસ્માત એટલો જોરદાર હતો કે બસમાં સવાર મુસાફરોની ચિચિયારીઓથી વાતાવરણ ગુંજી ઉઠ્યું હતું.

૭૦ વર્ષના વૃદ્ધાથી લઈને ૧૫ વર્ષની કિશોરી ઘાયલ

આ દુર્ઘટનામાં ઘાયલ થયેલા તમામ લોકો મુરબાડના રહેવાસી છે. ઘાયલોમાં કમલાબાઈ માલી (૭૦), ગુરુનાથ ડોંગરે (૬૦), બલરામ ભોઇર (૬૫), રવિન્દ્ર માલી (૪૫), ગુલાબબાઈ હુમને (૮૫), અશોક ડોંગરે (૬૦), કસ્તુરી માલી (૧૫) અને મીનાબાઈ ડોંગરેનો સમાવેશ થાય છે. તમામ ઘાયલોને તાત્કાલિક ખોપોલી મ્યુનિસિપલ હોસ્પિટલ લઈ જવામાં આવ્યા હતા અને ગંભીર ઇજાઓને જોતા બાદમાં પનવેલની MGM હોસ્પિટલ ખાતે ખસેડાયા છે.

બચાવ કામગીરી અને પોલીસ તપાસ

અકસ્માતની જાણ થતા જ બોરઘાટ હાઈવે ટ્રાફિક પોલીસ, IRB પેટ્રોલિંગ યુનિટ, ડેલ્ટા ફોર્સ અને હેલ્પ ફાઉન્ડેશનના સભ્યો ઘટનાસ્થળે પહોંચી ગયા હતા. એમ્બ્યુલન્સ દ્વારા ઘાયલોને હોસ્પિટલ ખસેડવામાં આવ્યા હતા. ખોપોલી પોલીસ સ્ટેશનના ઇન્સ્પેક્ટર સચિન હિરેએ જણાવ્યું હતું કે, "તીવ્ર વળાંક પર ડ્રાઈવરની ચૂકને કારણે આ અકસ્માત થયો હોય તેમ જણાય છે, હાલ તપાસ ચાલુ છે." પોલીસે ક્રેન દ્વારા ક્ષતિગ્રસ્ત વાહનને હટાવીને હાઈવે પર વાહનવ્યવહાર પૂર્વવત કરાવ્યો હતો.