મુંબઈ : મુંબઈની મેટ્રો સફરને માત્ર એક જગ્યાએથી બીજી જગ્યાએ પહોંચવાના સાધન પૂરતી સીમિત ન રાખતા તેને એક અવિસ્મરણીય અનુભવ બનાવવામાં આવી રહી છે. મુંબઈ મેટ્રોની એક્વા લાઈન પર મુસાફરો માટે એક અત્યંત આકર્ષક અને નવીન પહેલ શરૂ કરવામાં આવી છે. આ ખાસ વાર્ષિકોત્સવ નિમિત્તે મુસાફરો માત્ર ₹250 ના વિશેષ શુલ્ક સાથે એક્વા લાઈન પાસપોર્ટ મેળવી શકશે અને 10 અલગ-અલગ સ્ટેશનો પર જઈને તેના સ્ટેમ્પ એકત્રિત કરવાનો અનોખો રોમાંચ અનુભવી શકશે. આ અનોખી ‘સ્ટેમ્પ ટ્રિલ’ સફર આવતીકાલે સવારે 11 વાગ્યાથી સત્તાવાર રીતે શરૂ થઈ રહી છે.

આ ખાસ પાસપોર્ટ મેળવ્યા બાદ મુસાફરો માટે મેટ્રોના દરેક સ્ટેશનો માત્ર આવવા-જવાનું માધ્યમ નહીં રહે, પરંતુ સ્ટેમ્પ કલેક્શનની એક મજેદાર શોધયાત્રા બની જશે. કફ પરેડથી લઈને મરોલ નાકા સુધીના પસંદગીના સ્ટેશનો પર જઈને આ સ્ટેમ્પ્સ એકત્ર કરવાથી મુસાફરો પોતાની આ સફરને જીવનભરની યાદગીરીમાં ફેરવી શકશે. મુંબઈ શહેરને એક નવા જ અંદાજમાં એક્સપ્લોર કરવા અને અનોખી યાદો ભેગી કરવાના શોખીન યુવાનો તથા પ્રવાસીઓ માટે આ એક સોનેરી તક સમાન છે.

આ મર્યાદિત આવૃત્તિ (લિમિટેડ એડિશન) પાસપોર્ટ એક્વા લાઈન પર આવેલા કફ પરેડ, ચર્ચગેટ, હુતાત્મા ચોક, સીએસએમટી મેટ્રો, વરલી, સિદ્ધિવિનાયક, ધારાવી, બાંદ્રા-કુર્લા કોમ્પ્લેક્સ (BKC),    સીએસએમઆઈએ-ટી2 અને મરોલ નાકા—આમ કુલ 10 પસંદગીના સ્ટેશનો પર ઉપલબ્ધ રહેશે. દરેક સ્ટેશનનો વિશિષ્ટ સ્ટેમ્પ એકત્ર કરીને મુસાફરી કરવી એ રોજિંદા પ્રવાસને એક રોમાંચક એડવેન્ચરમાં બદલી નાખશે.

આ પાસપોર્ટની વિશેષ કિંમત ₹250 રાખવામાં આવી છે અને તેની ચૂકવણી માત્ર ડિજિટલ માધ્યમથી જ સ્વીકારવામાં આવશે. આ એક મર્યાદિત કલેક્ટીબલ આઇટમ હોવાથી ‘પહેલા આવો, પહેલા મેળવો’ ના ધોરણે ઉપલબ્ધ થશે. તો મુંબઈગરાઓ, તૈયાર થઈ જાઓ મેટ્રોની બારીમાંથી શહેરને નિહાળવા અને તમારા પાસપોર્ટમાં 10 સ્ટેશનોના 10 સ્ટેમ્પની અનોખી કહાની કંડારવા માટે!