મુંબઈ : મુંબઈના ભૂતપૂર્વ આસિસ્ટન્ટ પોલીસ ઇન્સ્પેક્ટર (એપીઆઇ) સચિન વાઝે મુખ્ય પ્રધાનના બંગલો અને મુંબઈ પોલીસ કમિશનરેટમાં જતી વખતે લક્ઝરી કારનો ઉપયોગ કરતા હોવા અંગે બોમ્બે હાઇ કોર્ટે ગુરુવારે આશ્ચર્ય વ્યક્ત કર્યું હતું. વર્ષ 2021માં એન્ટિલિયા નજીક વિસ્ફોટકો મૂકવા અને થાણેના બિઝનેસમેન મનસુખ હિરેનની હત્યાના કેસમાં વાઝે મુખ્ય આરોપી છે, જે હાલ જેલવાસ ભોગવી રહ્યો છે.

જસ્ટિસ ગિરીશ કુલકર્ણી અને જસ્ટિસ નીલા ગોખલેની ડિવિઝન બેન્ચે સુનાવણી દરમિયાન અવલોકન કર્યું હતું કે જ્યારે પોલીસ વરદીધારી વ્યક્તિ પર ગંભીર ગુનાના આરોપો લાગ ત્યારે તેની પ્રામાણિકતા અને આચરણ જેવાં પાસાં ચકાસવાં અનિવાર્ય બને છે. કોર્ટ નેશનલ ઇન્વેસ્ટિગેશન એજન્સી (એનઆઇએ) દ્વારા દાખલ કરાયેલી અપીલ પર સુનાવણી કરી રહી છે, જેમાં વિશેષ કોર્ટ દ્વારા વાઝેને આપવામાં આવેલા જામીનને પડકારવામાં આવ્યા છે.

સુનાવણી દરમિયાન સરકારી વકીલે સાક્ષીનું નિવેદન રજૂ કરતા જણાવ્યું હતું કે એપીઆઇ દરજ્જાનો અધિકારી હોવા છતાં વાઝે મર્સિડીઝ અને બીએમડબ્લ્યુ જેવી મોંઘી ગાડીઓમાં ફરતો હતો અને ત્રણ મહિના સુધી એક ખર્ચાળ હોટેલમાં રોકાયો હતો. કોર્ટે પ્રશ્ન કર્યો હતો કે સામાન્ય પગારદાર કર્મચારી આ પ્રકારની લક્ઝરી જીવનશૈલી કેવી રીતે અપનાવી શકે અને આ તમામ બાબતો તેની સામેના ખંડણીના આરોપો સાથે સીધી કડી ધરાવે છે.

આ કેસની પૃષ્ઠભૂમિ પર નજર કરીએ તો, 25 ફેબ્રુઆરી 2021ના રોજ ઉદ્યોગપતિ મુકેશ અંબાણીના નિવાસસ્થાન 'એન્ટિલિયા' નજીક વિસ્ફોટક ભરેલી એસયુવી મળી આવી હતી, અને થોડા દિવસો બાદ મનસુખ હિરેનનો મૃતદેહ શંકાસ્પદ સંજોગોમાં મળી આવ્યો હતો. આ પ્રકરણે સુરક્ષા એજન્સીઓ અને ન્યાયતંત્રમાં ભારે ખળભળાટ મચાવ્યો હતો.

અદાલતે આ કેસમાં ટૂંક સમયમાં ટ્રાયલ શરૂ કરવા તૈયારી દર્શાવી છે અને 150 જેટલા સાક્ષીઓની તપાસ કરવામાં આવશે તેમ જણાવ્યું છે. હાલ પૂરતો હાઇ કોર્ટે નીચલી કોર્ટના જામીન આદેશ પરનો વચગાળાનો સ્ટે ચાલુ રાખ્યો છે, જેથી વાઝે જેલમાં જ રહેશે.

આ મામલાની આગામી સુનાવણી આગામી 14 ઑક્ટોબરે હાથ ધરવામાં આવશે, જ્યાં આ કેસમાં વધુ ખુલાસાઓ થવાની સંભાવના છે.