મુંબઈ: મુંબઈના છત્રપતિ શિવાજી મહારાજ ઇન્ટરનેશનલ એરપોર્ટ (CSMIA) પર ડિરેક્ટોરેટ ઓફ રેવન્યુ ઇન્ટેલિજન્સ (DRI) ના અધિકારીઓએ બાતમીના આધારે બે આંતરરાષ્ટ્રીય સ્મગલરોને દબોચીને ડ્રગ્સની હેરાફેરીના એક બહુ મોટા નેટવર્કને ધ્વસ્ત કરી દીધું છે. ડીઆરઆઈની ટીમે ૨૪ કલાકની અંદર બે અલગ-અલગ સનસનાટીભર્યા ઓપરેશન હાથ ધરીને ગેરકાયદેસર બજારમાં આશરે ₹૧૩.૨૯ કરોડની કિંમતનું ૨.૬૫૯ કિલોગ્રામ શુદ્ધ કોકેન જપ્ત કર્યું છે. આ મામલે નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ હેઠળ એક મહિલા સહિત બે મુસાફરોની ધરપકડ કરીને પૂછપરછ શરૂ કરવામાં આવી છે.

પ્રથમ કેસ: મહિલા મુસાફરની બેગમાંથી મળ્યું ખતરનાક 'લિક્વિડ કોકેન'

DRI ના અધિકારીઓને એક ચોક્કસ અને ગુપ્ત માહિતી મળી હતી કે ઈથોપિયાના અદીસ અબાબાથી મુંબઈ આવી રહેલી એક મહિલા મુસાફર મોટા પાયે ડ્રગ્સ સપ્લાય કરવા જઈ રહી છે. મહિલા એરપોર્ટ પર ઉતરતા જ સુરક્ષા એજન્સીઓએ તેને ઘેરી લીધી હતી. શરૂઆતમાં તેની સામાન્ય તપાસમાં કંઈ મળ્યું નહોતું, પરંતુ જ્યારે તેની બેગની ઝીણવટભરી તલાશી લેવામાં આવી ત્યારે અધિકારીઓ પણ ચોંકી ઉઠ્યા હતા. બેગની અંદર છુપાવેલા ૮ ગુપ્ત પાઉચ મળી આવ્યા હતા, જેની અંદર આશરે ₹૭.૮૭ કરોડની કિંમતનું ૧.૫૭૫ કિલોગ્રામ અત્યંત મોંઘું 'લિક્વિડ કોકેન' (પ્રવાહી ડ્રગ્સ) ભરવામાં આવ્યું હતું. સ્મગલિંગની આ અનોખી રીત જોઈને અધિકારીઓ પણ દંગ રહી ગયા હતા.

દિલધડક બીજું ઓપરેશન: આફ્રિકન યુવાન પેટમાં ડ્રગ્સના કેપ્સ્યુલ્સ ગળીને લાવ્યો

હજુ પ્રવાહી કોકેનનો મામલો શાંત પડ્યો નહોતો ત્યાં જ એરપોર્ટ પરથી બીજા એક આફ્રિકન પુરુષ મુસાફરની શંકાસ્પદ હિલચાલના આધારે અટકાયત કરવામાં આવી હતી. જ્યારે તેની કડકાઈથી પૂછપરછ કરવામાં આવી અને મેડિકલ સ્ક્રિનિંગ (એક્સ-રે) કરવામાં આવ્યું ત્યારે માલૂમ પડ્યું કે તેણે પોતાના પેટની અંદર ડ્રગ્સની આખી ફેક્ટરી છુપાવી રાખી હતી! આ તસ્કર પોતાના પેટમાં કોકેનથી ભરેલી નાની-નાની ૭૦ કેપ્સ્યુલ્સ ગળીને ભારત લાવ્યો હતો. હોસ્પિટલની મદદથી તેના પેટમાંથી સુરક્ષિત રીતે તમામ ૭૦ કેપ્સ્યુલ્સ બહાર કાઢવામાં આવી હતી, જેનું વજન ૧.૦૮૪ કિલોગ્રામ હતું અને આંતરરાષ્ટ્રીય બજારમાં તેની કિંમત કરોડો રૂપિયા આંકવામાં આવી રહી છે.

'નશા મુક્ત ભારત' માટે DRI ની કટિબદ્ધતા, તપાસ તેજ:

ડીઆરઆઈના વરિષ્ઠ અધિકારીઓએ જણાવ્યું હતું કે આ બંને મુસાફરો આંતરરાષ્ટ્રીય ટ્રાફિકિંગ સિન્ડિકેટના માત્ર મહોરાં (કેરિયર્સ) છે. આ કરોડો રૂપિયાનું ડ્રગ્સ મુંબઈ અને ગોવાની હાઈ પ્રોફાઈલ રેવ પાર્ટીઓ અને લોકલ પેડલર્સ સુધી પહોંચાડવાનું હતું. હાલમાં આ બંને વિદેશી નાગરિકોના ભારતીય કનેક્શન અને આ કાળા કારોબાર પાછળના અસલી માસ્ટરમાઇન્ડને ઉજાગર કરવા માટે વ્યાપક તપાસ ચાલી રહી છે. ડીઆરઆઈએ સ્પષ્ટ કર્યું છે કે દેશના સ્વાસ્થ્ય, સુરક્ષા અને સુખાકારીને નુકસાન પહોંચાડતા આવા ડ્રગ માફિયાઓ સામે ઝીરો ટોલરન્સની નીતિ ચાલુ રહેશે.