નવી દિલ્હી, તા.૦૧: તૃણમૂલ કોંગ્રેસના ફાયરબ્રાન્ડ સાંસદ મહુઆ મોઇત્રાને તેમના પોતાના જ સંસદીય મતવિસ્તાર કૃષ્ણનગરમાં પૂરતી સુરક્ષા પૂરી પાડવા અને સર્કિટ હાઉસમાંથી અડધી રાત્રે અયોગ્ય રીતે બહાર કાઢી મૂકવાના મામલે સુપ્રીમ કોર્ટે પશ્ચિમ બંગાળ સરકાર તથા કેન્દ્ર સરકાર પાસે તાત્કાલિક જવાબ માગ્યો છે. ગુરુવારે જસ્ટિસ જોયમાલ્યા બાગચી અને જસ્ટિસ વી. મોહનાની ખંડપીઠ સમક્ષ યોજાયેલી સુનાવણી દરમિયાન અદાલતે નાદિયા જિલ્લા વહીવટીતંત્રની ભૂમિકા સામે આકરા સવાલો ઊભા કર્યા હતા. કોર્ટે પશ્ચિમ બંગાળ સરકારને એક સપ્તાહની અંદર પોતાનો જવાબ દાખલ કરવા આદેશ કર્યો છે, જ્યારે અરજદારને પણ ત્યાર બાદ એક અઠવાડિયામાં વળતો જવાબ (રિજોઇન્ડર) રજૂ કરવાની મંજૂરી આપવામાં આવી છે.

આ સમગ્ર વિવાદની શરૂઆત ૧૪ ઓગસ્ટની મધ્યરાત્રિએ થઈ હતી જ્યારે સંસદના સત્ર બાદ કૃષ્ણનગર સર્કિટ હાઉસમાં ઉતરેલાં સાંસદ મહુઆ મોઇત્રાને જિલ્લા વહીવટીતંત્રે રૂમ ખાલી કરવા માટે મજબૂર કર્યા હતા. મોઇત્રાનો આક્ષેપ છે કે વહીવટીતંત્રે નિયમોનું બહાનુ બતાવીને મધ્યરાત્રિએ તેમને હેરાન કરવાના ઈરાદાથી બહાર કાઢવાનો પ્રયાસ કર્યો હતો. આ ઘટના દરમિયાન સર્કિટ હાઉસની બહાર મોટી સંખ્યામાં ટોળું એકઠું થઈ ગયું હતું અને નારાબાજી કરવા લાગ્યું હતું, જેના કારણે સાંસદની સુરક્ષા જોખમમાં મુકાઈ ગઈ હતી.

સુપ્રીમ કોર્ટમાં સુનાવણી દરમિયાન કેન્દ્ર અને રાજ્ય સરકાર વતી હાજર રહેલા સોલિસિટર જનરલ તુષાર મહેતાએ નોટિસ જારી ન કરવાની વિનંતી કરતા કહ્યું હતું કે તેઓ સીધો જવાબ દાખલ કરશે. આ તબક્કે સર્કિટ હાઉસના નિયમો અને ૧ સપ્ટેમ્બરના પત્રનો ઉલ્લેખ કરીને બેંચે આશ્ચર્ય વ્યક્ત કરતાં પૂછ્યું હતું કે, "જો કોઈ ચૂંટાયેલા સંસદસભ્ય સરકારી સર્કિટ હાઉસમાં આવે, તો શું તેમણે ત્રણ દિવસ પહેલાં જાણ કરવી પડે?" બેંચે સ્પષ્ટ કર્યું હતું કે લોકપ્રતિનિધિની સુરક્ષા અને અધિકારો સાથે બાંધછોડ સાંખી લેવાય નહીં.

સાંસદ મહુઆ મોઇત્રાએ લોકસભાના સ્પીકર ઓમ બિરલાને પણ પત્ર લખીને નાદિયા જિલ્લાના કલેક્ટર અને પોલીસ અધિક્ષક (SP) સામે આકરા પગલાં લેવા માંગ કરી હતી. તેમણે રજૂઆત કરી હતી કે કલેક્ટર અને એસપીના બંગલાની બિલકુલ સામે જ આવેલા અતિસુરક્ષિત ગણાતા સર્કિટ હાઉસ પર હિંસક ટોળું એકઠું થઈ જાય તે સ્થાનિક પોલીસ તંત્રની ગંભીર બેદરકારી દર્શાવે છે. કાયદેસર બુકિંગ હોવા છતાં તેમને રાત્રે મુશ્કેલીમાં મુકવાનો પ્રયાસ કરાયો હતો.

મોઇત્રાના વરિષ્ઠ વકીલ ગોપાલ શંકરનારાયણને અદાલતમાં દલીલ કરી હતી કે એક મહિલા સાંસદને પોતાના જ વિસ્તારમાં સુરક્ષા આપવાને બદલે રાજકીય દ્વેષબુદ્ધિથી કાનૂની અધિકારોથી વંચિત રાખવામાં આવી રહ્યા છે. આ પ્રકારનું વર્તન લોકશાહીના મૂલ્યો અને લોકપ્રતિનિધિના વિશેષાધિકારોનું ઉલ્લંઘન છે. જો સુરક્ષિત સરકારી જગ્યાઓ પર જ સાંસદ સુરક્ષિત ન હોય તો સામાન્ય નાગરિકોની સુરક્ષા સામે પણ પ્રશ્નાર્થ ચિહ્ન ઊભું થાય છે.

આ કેસમાં હવે આગામી પખવાડિયામાં સુપ્રીમ કોર્ટમાં મહત્વની સુનાવણી હાથ ધરવામાં આવશે. બંગાળ સરકાર દ્વારા રજૂ કરવામાં આવનારા સોગંદનામા પર સમગ્ર દેશની નજર ટકેલી છે. સર્કિટ હાઉસની સુરક્ષામાં થયેલી ખામી અને સાંસદ સાથે કરાયેલા વર્તન અંગે સુપ્રીમ કોર્ટ શું આકરા દિશા-નિર્દેશો આપે છે તે જોવું મહત્વનું રહેશે.