મેરઠ, તા.૦૭: ઉત્તર પ્રદેશના મેરઠ જિલ્લાના ખરદૌની ગામમાં પોલીસે એક એવી ગેરકાયદે હથિયાર ફેક્ટરી ઝડપી પાડી છે, જેની મોડસ ઓપરેન્ડી જોઈને તપાસ અધિકારીઓ પણ ચોંકી ઉઠ્યા હતા. કોઈ રોમાંચક ફિલ્મના દ્રશ્યની જેમ, એક સામાન્ય દેખાતા ઘરની અંદર કબાટની પાછળ એક ગુપ્ત રસ્તો બનાવવામાં આવ્યો હતો, જે સીધો ભોંયરામાં અને ત્યાંથી એક લાંબી સુરંગમાં ખુલતો હતો. આ સુરંગમાં જ ગેરકાયદેસર પિસ્તોલ અને તમંચા બનાવવાનું નેટવર્ક ધમધમી રહ્યું હતું.
ગુપ્ત માહિતીના આધારે કરવામાં આવેલી આ દરોડાની કાર્યવાહીમાં પોલીસે મુખ્ય આરોપી ઈમરાન સહિત ચાર લોકોની ધરપકડ કરી છે. આશ્ચર્યની વાત એ છે કે આ ગેંગમાં ૧૯ વર્ષનો ઉમંગ ઠાકુર નામનો BCA નો વિદ્યાર્થી પણ સામેલ હતો. આ ટોળકી ઘરની અંદર છુપાઈને પિસ્તોલ, મેગેઝીન અને દેશી તમંચા તૈયાર કરતી હતી. દરોડા દરમિયાન ઈમરાન હથિયાર બનાવતા રંગેહાથ ઝડપાઈ ગયો હતો.
વોટ્સએપ દ્વારા થતું હતું વેચાણ
પોલીસ તપાસમાં બહાર આવ્યું છે કે આ ગેરકાયદે હથિયારોના વેચાણ અને સપ્લાય માટે ગેંગ વોટ્સએપનો ઉપયોગ કરતી હતી. તેઓ મુઝફ્ફરનગર સહિત આસપાસના અનેક જિલ્લાઓમાં હથિયારો સપ્લાય કરતા હતા. હાલ પોલીસ આ આખી સપ્લાય ચેઈન અને તેમના ગ્રાહકોની વિગતો મેળવવા માટે વધુ પૂછપરછ કરી રહી છે.
અગાઉ બેડની નીચે મળી હતી ફેક્ટરી
મેરઠમાં ગેરકાયદે હથિયારો બનાવવાની આ કોઈ પહેલી ઘટના નથી. થોડા દિવસો પહેલા લોહિયા નગરના અલીપુર ગામમાં પણ આવો જ એક કિસ્સો પ્રકાશમાં આવ્યો હતો. ત્યાં ઘરની અંદર ડબલ બેડની નીચે ભોંયરું બનાવી ફેક્ટરી ચલાવવામાં આવતી હતી. તે ભોંયરામાં કામદારો માટે ટેબલ ફેન અને ઓક્સિજન પાઈપ જેવી સુવિધાઓ પણ રાખવામાં આવી હતી. પોલીસ અધિકારીઓએ જણાવ્યું છે કે આવા નેટવર્કને જડમૂળથી ઉખેડી ફેંકવા માટે ઓપરેશન સતત ચાલુ રહેશે.