મુંબઈ : ભારતીય મનોરંજન ઉદ્યોગ અને બોલિવૂડ જગતમાંથી એક અત્યંત દુઃખદ સમાચાર સામે આવ્યા છે. 'વેલકમ', 'ગદર: એક પ્રેમ કથા' અને 'જોડી નંબર ૧' જેવી અનેક સુપરહિટ ફિલ્મોમાં પોતાની અદ્ભુત અદાકારી અને કોમિક ટાઈમિંગથી દર્શકોના દિલ જીતનારા જાણીતા અભિનેતા મુસ્તાક ખાનનું ૫૬ વર્ષની વયે દુઃખદ અવસાન થયું છે. તેઓ છેલ્લા પાંચ વર્ષથી ગંભીર કેન્સરની બીમારી સામે લડત આપી રહ્યા હતા. મુંબઈની નાણાવટી હોસ્પિટલમાં સારવાર દરમિયાન તેમણે આખરી શ્વાસ લેતાં સમગ્ર બોલિવૂડ અને ટીવી ઉદ્યોગમાં શોકની લહેર ફરી વળી છે.

મધ્યપ્રદેશના બાલાઘાટ જિલ્લાના બૈહર શહેરમાં જન્મેલા મુસ્તાક ખાને પોતાની દમદાર એક્ટિંગથી હિન્દી સિનેમામાં એક આગવી ઓળખ ઊભી કરી હતી. તેમને ૨૦૦૭માં આવેલી મલ્ટીસ્ટારર કોમેડી ફિલ્મ 'વેલકમ'માં 'બલ્લુ'ની યાદગાર ભૂમિકા ભજવવા માટે સહુથી વધુ પ્રેમ મળ્યો હતો. આ સિવાય તેમણે 'હેરા ફેરી', 'હમ હૈ રાહી પ્યાર કે', 'વોન્ટેડ' જેવી બ્લોકબસ્ટર ફિલ્મો ઉપરાંત ટીવી ક્ષેત્રે 'કુછ રંગ પ્યાર કે ઐસે ભી', 'વાગલે કી દુનિયા' અને 'નુક્કડ' જેવા લોકપ્રિય શોમાં પોતાની બહુમુખી પ્રતિભાનો પરચો આપ્યો હતો.

પ્રાપ્ત માહિતી અનુસાર, મુસ્તાક ખાનને પાંચ વર્ષ પહેલાં કેન્સરનું નિદાન થયું હતું. તાજેતરમાં તેમની તબિયત ફરીથી વધુ લથડતાં તેમને છેલ્લા ૧૫ દિવસથી મુંબઈની નાણાવટી હોસ્પિટલમાં દાખલ કરવામાં આવ્યા હતા, જ્યાં ડોક્ટરોના તમામ પ્રયાસો છતાં તેઓ જિંદગીની જંગ હારી ગયા હતા. તેમના નિધનના સમાચાર મળતાં જ અમિતાભ બચ્ચન, અક્ષય કુમાર સહિતના દિગ્ગજ કલાકારો અને તેમના ચાહકોએ સોશિયલ મીડિયા પર ઊંડા શોકની સંવેદના વ્યક્ત કરી ભાવાંજલિ અર્પણ કરી છે.