સુપૌલ : બિહારના સુપૌલમાં એક અત્યંત સનસનાટીભર્યા અને કાળજું કંપાવી દેનારા કિસ્સામાં મોબાઇલ ફોનથી શરૂ થયેલા પ્રેમસંબંધ બાદ પ્રભુતામાં પગલાં પાડનાર નવપરિણીત મહિલાના લગ્નજીવનનો માત્ર 9 મહિનામાં જ કરૂણ અંત આવ્યો છે. આ હૃદયદ્રાવક ઘટનામાં એક નરાધમ પતિએ પોતાની જ પત્ની પર પેટ્રોલ છાંટીને તેને જીવતી સળગાવી દીધી હતી. આ બનાવ રતનપુર પોલીસ સ્ટેશન વિસ્તાર હેઠળ આવતી સુપૌલ સબ-બ્રાન્ચ કેનાલ નજીકના લાલમનપટ્ટી ગામ પાસે બન્યો હતો, જ્યાં કાળજું કંપાવી દેતી સ્થિતિમાં પીડિત મહિલા આશરે અડધો કિલોમીટર સુધી ભડકે બળતી હાલતમાં જીવ બચાવવા માટે રસ્તા પર દોડતી રહી હતી.

બનાવની પ્રાથમિક વિગતો મુજબ, મોબાઇલ પર પ્રેમ પાંગર્યા બાદ યુવતીએ પોતાના સાસરિયાઓ સામે જઈને પ્રેમી સાથે લગ્ન કર્યા હતા. પરંતુ લગ્ન બાદ પતિ-પત્ની વચ્ચેના સંબંધોમાં અણબનાવ અને તણાવ ઊભો થયો હતો. આ વિવાદ વચ્ચે નરાધમ પતિએ ઝઘડો કરીને પત્ની પર જ્વલનશીલ પેટ્રોલ છાંટીને આગ ચાંપી દીધી હતી. આગમાં લપેટાયેલી મહિલા અસહ્ય વેદના સાથે અડધો કિલોમીટર સુધી ભાગતી રહી હતી, જેને જોઈને સ્થાનિક ગ્રામજનો સ્તબ્ધ થઈ ગયા હતા અને ત્વરિત મદદ માટે દોડી આવ્યા હતા.

સ્થાનિક ગ્રામજનોએ ભારે જહમત બાદ આગ બુઝાવીને ગંભીર રીતે દાઝી ગયેલી મહિલાને તત્કાલ સુપૌલ સદર હોસ્પિટલ ખાતે ખસેડી હતી. હોસ્પિટલના ઇમરજન્સી વોર્ડમાં તબીબો દ્વારા તેને બચાવવાના ભગીરથ પ્રયાસો કરવામાં આવ્યા હતા, પરંતુ શરીરનો મોટાભાગનો હિસ્સો ગંભીર રીતે દાઝી ગયો હોવાથી સારવાર દરમિયાન જ તેનો કરૂણ પ્રાણપંખેરું ઊડી ગયો હતો. આ બનાવની જાણ થતાં જ ભપટિયાહી અને રતનપુર પોલીસ સ્ટેશનની સંયુક્ત પોલીસ ટીમો ઘટનાસ્થળે પહોંચી હતી અને પરિસ્થિતિની ગંભીરતા જોઈને આગળની કાર્યવાહી શરૂ કરી હતી.

દહેજ અથવા ઘરકંકાસને કારણે મહિલાઓ પર આચરવામાં આવતા અત્યાચારોના કિસ્સાઓ અગાઉ પણ સામે આવતા રહ્યા છે, ત્યારે આ ઘટનાથી સમગ્ર વિસ્તારમાં આક્રોશ વ્યાપી ગયો છે. હાલમાં પોલીસે મૃતદેહનો કબજો મેળવીને પંચનામું કર્યા બાદ પોસ્ટમોર્ટમ માટે મોકલી આપ્યો છે. આ કેસમાં હત્યાનો ગુનો નોંધીને ઘટના બાદ તુરંત ફરાર થઈ ગયેલા પાપી પતિને પકડી પાડવા માટે રતનપુર અને ભપટિયાહી પોલીસે અલગ-અલગ ટીમ બનાવીને જુદા જુદા સ્થળોએ સઘન દરોડા અને તપાસ તેજ બનાવી છે.