નવી દિલ્હી :  આધુનિક યુગમાં નારી સશક્તિકરણ અને સમાનતાના દાવાઓ વચ્ચે દંપતીના આર્થિક સંબંધોને લઈને એક અત્યંત રસપ્રદ અને આશ્ચર્યજનક વિશ્લેષણ સામે આવ્યું છે. સામાન્ય રીતે એવું માનવામાં આવે છે કે ઘરમાં વધુ પૈસા આવવાથી ખુશી અને સ્થિરતા વધે છે, પરંતુ ‘ધી ઈકોનોમિસ્ટ’ દ્વારા રજૂ કરાયેલા 17 વર્ષના એક ગહન અભ્યાસના ડેટા દર્શાવે છે કે જ્યારે પત્ની પતિ કરતાં વધુ કમાણી કરવા લાગે છે, ત્યારે સંબંધોમાં અણધાર્યો તણાવ અને વિવાદ જન્મ લે છે. સમાજે ભલે મહિલાઓની વ્યાવસાયિક સફળતાને સ્વીકારી લીધી હોય, પરંતુ ઘરની અંદર 'મુખ્ય કમાઉ વ્યક્તિ' તરીકેની ભૂમિકા બદલાતાં જ પરંપરાગત માનસિકતા આડે આવે છે.

અભ્યાસના પરિણામો મુજબ, જે ઘરોમાં મહિલાઓ કુલ કમાણીનો 70 ટકા કે તેથી વધુ હિસ્સો રળે છે, ત્યાં પુરુષોમાં ગંભીર માનસિક તણાવ અનુભવવાની શક્યતા અઢી ગણી (2.5 ગણી) વધી જાય છે. આ પેટર્ન માત્ર પરણિત યુગલોમાં જ નહીં પરંતુ લિવ-ઈન રિલેશનશિપમાં રહેતા યુગલોમાં પણ જોવા મળી છે, જ્યાં પત્નીની આવક 50 ટકાથી વધતાં જ પુરુષોમાં અસ્વસ્થતા અને દબાણનું પ્રમાણ 1.5 ગણું વધી ગયું હતું. ઉંમર, શિક્ષણ કે આવકના સ્તરમાં ફેરફાર છતાં આ આંકડાઓ સમાન રહ્યા છે, જે સ્પષ્ટ કરે છે કે મુદ્દો પૈસાના જથ્થાનો નથી પરંતુ "કમાનાર કોણ છે?" તે અહંકાર અને ઓળખનો છે.

સમાજમાં પેઢીઓથી પુરુષને 'મુખ્ય પોષક અને રક્ષક' તરીકે જોવાની જે ટેવ પડી છે, તે માનસિકતા અચાનક બદલાતી નથી. પતિ ભલે પત્નીની સફળતા પર ગર્વ અનુભવતો હોય, પરંતુ સંબંધીઓ, મિત્રો અને સમાજ તરફથી મળતા પરોક્ષ મહેણાં કે અપેક્ષાઓ તેને અંદરથી કોરી ખાય છે. આ ઉપરાંત, વિશ્લેષણમાં એ પણ સામે આવ્યું છે કે કમાણી વધી જવા છતાં ઘણી મહિલાઓ પર ઘરકામ અને પરિવારની સંભાળનો બોજ યથાવત રહે છે, જેના કારણે સંબંધોમાં સંતોષનું પ્રમાણ ઘટે છે. આ અહેવાલ સાબિત કરે છે કે નાણાકીય સ્વતંત્રતા ચોક્કસ આવી છે, પરંતુ પુરુષ અને સ્ત્રીની પરંપરાગત સામાજિક ભૂમિકાઓ બદલવામાં હજુ લાંબી મજલ કાપવાની બાકી છે.