અયોધ્યા : રાષ્ટ્રીય સ્વયંસેવક સંઘ (RSS) ના વડા મોહન ભાગવતે તેમના તાજેતરના અમેરિકા પ્રવાસ દરમિયાન શનિવારે ન્યૂયોર્કમાં યોજાયેલા 'વન વર્લ્ડ, વન હ્યુમેનિટી' કાર્યક્રમમાં સનાતન ધર્મ અને હિન્દુત્વની વ્યાખ્યા કરતા અત્યંત મહત્વપૂર્ણ નિવેદન આપ્યું હતું કે, "જો કોઈ હિન્દુ એમ માને છે કે ભારતમાં કોઈ મુસ્લિમ ન હોવા જોઈએ, તો તે સાચો હિન્દુ રહેતો જ નથી." આ નિવેદનની દેશભરમાં વ્યાપક ચર્ચા થઈ રહી છે, ત્યારે અયોધ્યામાં ઐતિહાસિક બાબરી મસ્જિદ કેસના ભૂતપૂર્વ મુખ્ય વાદી ઇકબાલ અંસારીએ ભાગવતના આ નિવેદનને ખુલ્લા મને આવકારીને તેને શત પ્રતિશત સાચું ગણાવ્યું છે, જેણે હિન્દુ-મુસ્લિમ સંબંધો અને રાષ્ટ્રીય એકતાના સંદર્ભમાં નવો સકારાત્મક માહોલ ઊભો કર્યો છે.
મળતી માહિતી અનુસાર  ઇકબાલ અંસારીએ સ્પષ્ટ શબ્દોમાં જણાવ્યું હતું કે, ભારત સદીઓથી હિન્દુઓ અને મુસ્લિમો વચ્ચેના ભાઈચારા અને પરસ્પર સ્નેહની પવિત્ર ભૂમિ રહી છે અને દેશે હવે નકારાત્મકતા છોડીને માત્ર પ્રગતિ તરફ આગળ વધવું જોઈએ. અંસારીએ ભાગવતની પ્રશંસા કરતા કહ્યું, "મોહન ભાગવતજી અનુભવી નેતા છે અને તેઓ દેશના વિકાસ, પ્રગતિ અને રોજગાર પર ધ્યાન કેન્દ્રિત કરીને સાચી વાત કહી રહ્યા છે. આપણા દેશને એવા જ નેતાઓની જરૂર છે જેઓ હિન્દુ-મુસ્લિમ વચ્ચે એકતાને પ્રોત્સાહન આપીને તમામને સાથે લઈને ચાલે. જો બંને સમુદાયો વચ્ચે ભાઈચારો મજબૂત રહેશે, તો આપણો દેશ સમગ્ર વિશ્વમાં પોતાની એક અલગ અને શ્રેષ્ઠ ઓળખ ઊભી કરી શકશે."
અંસારીએ ધર્મ અને માનવતાના સમન્વય પર ભાર મૂકતા ગીતાનો ઉલ્લેખ કર્યો અને જણાવ્યું કે, "ધર્મના નામે આપણે ભલે અલગ હોઈએ, પરંતુ આપણા કર્મો દેશહિત માટે સમાન હોવા જોઈએ. ગીતા પણ શીખવે છે કે કર્મોની પૂજા થાય છે અને ભગવાન કર્મનું ફળ આપે છે. અમે અયોધ્યાના રહેવાસી છીએ અને ભગવાન રામ હોય, હનુમાન હોય કે અલ્લાહ, અમે તમામ ધર્મોનું સમાન આદર કરીએ છીએ." બીજી તરફ, ન્યૂયોર્કના કાર્યક્રમમાં મોહન ભાગવતે સંઘના કાર્યોનું ઉદાહરણ આપવા માટે ૧૯૯૬ની હરિયાણાની ચરખી દાદરી વિમાન દુર્ઘટના (જ્યાં બે વિમાનો અથડાયા હતા અને મોટાભાગના મુસાફરો મુસ્લિમ હતા) નો વિશેષ ઉલ્લેખ કર્યો હતો. તેમણે કહ્યું કે તે ગંભીર દુર્ઘટના સમયે આરએસએસના સ્વયંસેવકો ધર્મ જોયા વિના સૌથી પહેલા બચાવ કામગીરી માટે પહોંચ્યા હતા, જે સંઘની અસલી માનવતાવાદી વિચારધારા દર્શાવે છે.
રામ જન્મભૂમિ-બાબરી મસ્જિદ વિવાદના લાંબા કાનૂની જંગ બાદ સુપ્રીમ કોર્ટના ચુકાદાથી અયોધ્યામાં ભવ્ય રામ મંદિરનું નિર્માણ થઈ ચૂક્યું છે, અને ઇકબાલ અંસારી અગાઉ રામ મંદિરના પ્રાણ પ્રતિષ્ઠા મહોત્સવમાં પણ સકારાત્મક અભિગમ સાથે સામેલ થયા હતા. મોહન ભાગવત દ્વારા આંતરરાષ્ટ્રીય મંચ પરથી સાંપ્રદાયિક સૌહાર્દનો આ નવો સંદેશ અને તેના પર અંસારી જેવા અગ્રણી મુસ્લિમ ચહેરાનું આ સમર્થન, આગામી સમયમાં દેશના સામાજિક અને રાજકીય સમીકરણો પર ઊંડી અસર પાડી શકે છે અને ધાર્મિક ધ્રુવીકરણ ઘટાડવામાં મહત્વનો ભાગ ભજવી શકે છે.