કોલકાતા: વડાપ્રધાન નરેન્દ્ર મોદી આવતીકાલથી પશ્ચિમ બંગાળ અને ઓડિશાના પ્રવાસે જઈ રહ્યા છે, જે પૂર્વ ભારતના વિકાસ અને સાંસ્કૃતિક ગૌરવ માટે અત્યંત મહત્વપૂર્ણ સાબિત થશે. ૨૦ અને ૨૧ જૂનના આ વ્યસ્ત પ્રવાસ દરમિયાન પીએમ મોદી હુગલી જિલ્લાના ઐતિહાસિક તારકેશ્વર ખાતે 'પશ્ચિમ બંગાળ દિવસ'ની ભવ્ય ઉજવણીમાં સામેલ થશે. ડૉ. શ્યામા પ્રસાદ મુખર્જીના વારસા અને બંગાળની સંસ્કૃતિના રક્ષણ સાથે જોડાયેલા આ પવિત્ર સ્થળેથી વડાપ્રધાન રાજ્ય માટે અનેક પ્રગતિશીલ વિકાસ કાર્યોનું ઉદ્ઘાટન અને શિલાન્યાસ કરીને બંગાળના લોકોને મોટી ભેટ આપશે.

આ પ્રવાસનો સૌથી મોટો હાઈલાઈટ રવિવારે કોલકાતામાં યોજાનારો ૧૨મો 'આંતરરાષ્ટ્રીય યોગ દિવસ' રહેશે. આ વર્ષે ૨૦૨૬માં યોગ દિવસની વૈશ્વિક થીમ "સ્વસ્થ વૃદ્ધત્વ માટે યોગ" રાખવામાં આવી છે, જે અંતર્ગત પીએમ મોદી કોલકાતાથી દેશ અને દુનિયાને શારીરિક-માનસિક સુખાકારીનો સંદેશ આપશે અને વિશાળ જનમેદની સાથે યોગાભ્યાસ કરશે. આ ઉપરાંત, રાષ્ટ્રની સુરક્ષાને વધુ મજબૂત કરવાના હેતુથી, પીએમ મોદી કોલકાતાના શ્યામા પ્રસાદ મુખર્જી બંદર પરથી ભારતીય નૌકાદળની તાકાત વધારતા ત્રણ સંપૂર્ણ સ્વદેશી યુદ્ધજહાજો—INS દુનાગિરી, INS સંશોધન અને INS અગ્રેને દેશને સમર્પિત (કમિશન) કરશે.

બંગાળ બાદ પીએમ મોદી પાડોશી રાજ્ય ઓડિશાની મુલાકાતે જશે, જ્યાં તેઓ મયૂરભંજમાં ભાજપ સરકારના સફળ બે વર્ષ પૂર્ણ થવાના ભવ્ય કાર્યક્રમની શોભા વધારશે. આ મુલાકાત દરમિયાન એક અનોખો દ્રશ્ય જોવા મળશે, જ્યાં વડાપ્રધાન નરેન્દ્ર મોદી દેશના રાષ્ટ્રપતિ દ્રૌપદી મુર્મુ સાથે તેમના વતન મયૂરભંજમાં પરંપરાગત 'સંથાલી જાહેર' અને 'હો જાહેર' પવિત્ર સ્થાનો પર જઈને આદિવાસી રીત-રિવાજ મુજબ પૂજા-અર્ચના કરશે. આ પ્રવાસ પૂર્વ ભારતના રાજકીય, સંરક્ષણ અને સામાજિક તાણાવાણાને વધુ મજબૂત કરવા માટે એક માઈલસ્ટોન સાબિત થવા જઈ રહ્યો છે.