નવી દિલ્હી: સુપ્રીમ કોર્ટે મહત્ત્વપૂર્ણ ચુકાદામાં સ્પષ્ટ કર્યું છે કે હત્યા જેવા જઘન્ય અપરાધમાં સંડોવાયેલા સગીર આરોપી સામે જરૂરી કાયદાકીય શરતો પૂર્ણ થતી હોય તો પુખ્ત આરોપીની જેમ કેસ ચલાવી શકાય છે.

જસ્ટિસ જે. બી. પારડીવાલા અને જસ્ટિસ ઉજ્જલ ભુયાનની ખંડપીઠે એક સગીર આરોપીની અરજી ફગાવતાં જણાવ્યું હતું કે જુવેનાઇલ જસ્ટિસ અધિનિયમ, ૨૦૧૫ હેઠળ હત્યાનો ગુનો જઘન્ય અપરાધની શ્રેણીમાં આવે છે. જોકે સગીર સામે પુખ્તની જેમ કેસ ચલાવવાનો નિર્ણય આપમેળે લઈ શકાય નહીં.

કાયદા મુજબ આરોપીની ઉંમર સોળથી અઢાર વર્ષની વચ્ચે હોય ત્યારે જુવેનાઇલ જસ્ટિસ બોર્ડે તેની માનસિક અને શારીરિક ક્ષમતા, ગુનાનાં પરિણામો સમજવાની શક્તિ તથા ગુનો કયા સંજોગોમાં આચરાયો તેની પ્રાથમિક તપાસ કરવી જરૂરી છે. આ મૂલ્યાંકન બાદ જ કેસ બાળ અદાલતમાં મોકલી પુખ્ત આરોપીની જેમ કાર્યવાહી કરવી કે નહીં તે નક્કી થઈ શકે છે.

આ ચુકાદો બિહારમાં એક કિશોરનું ગળું કાપીને હત્યા કરવાના આરોપનો સામનો કરી રહેલા સોળ વર્ષના સગીરની અપીલ પર આપવામાં આવ્યો હતો. પટણા હાઇકોર્ટે તેની સામે પુખ્ત આરોપીની જેમ કેસ ચલાવવાની મંજૂરી આપી હતી, જેને સુપ્રીમ કોર્ટે યથાવત રાખી છે.