નવી દિલ્‍હી, તા.૧૪: પશ્ચિમ એશિયામાં અમેરિકા અને ઈરાન વચ્‍ચે ફરી એકવાર ફાટી નીકળેલા ભીષણ સૈન્‍ય સંઘર્ષની ભારે કિંમત નિર્દોષ ભારતીય નાવિકોએ ચૂકવવી પડી રહી છે. હોર્મુઝની ખાડી અને ઓમાનના અખાત નજીક પસાર થઈ રહેલા સંયુક્‍ત આરબ અમીરાતના બે અત્‍યંત મહત્‍વના ઓઇલ ટેન્‍કરો મોમ્‍બાસા અને અલ બહિયાહ પર ઈરાન દ્વારા વિધ્‍વંસક ક્રૂઝ મિસાઈલોથી હુમલો કરવામાં આવ્‍યો હતો. આ ભયાનક હુમલામાં ઓઇલ ટેન્‍કર મોમ્‍બાસા પર સવાર એક ભારતીય નાવિકનું કરુણ મોત નીપજ્‍યું છે, જ્‍યારે અન્‍ય છ ભારતીયો સહિત કુલ આઠ ક્રૂ મેમ્‍બર્સ ગંભીર રીતે ઘાયલ થયા છે. મિસાઈલ ટકરાતાની સાથે જ બંને ટેન્‍કરો આગની ચપેટમાં આવી ગયા હતા અને વૈશ્વિક ઉર્જા માર્ગો પર મોટો ખતરો ઉભો થયો હતો. આંતરરાષ્‍ટ્રીય સ્‍તરે આ ઘટનાની ઘેરી નિંદા કરવામાં આવી રહી છે.

દરિયાઈ સીમા પર પોતાના નાગરિકના લોહી વહેવાની ઘટના પર ભારતે અત્‍યંત આક્રમક અને કડક વલણ અપનાવ્‍યું છે. ભારતીય વિદેશ મંત્રાલયે આ મામલે સહેજ પણ ઢીલાશ ન દાખવતા દિલ્‍હીમાં ઈરાનના ડેપ્‍યુટી ચીફ ઓફ મિશન મોહમ્‍મદ જાવદ હોસેનીને તાત્‍કાલિક અસરથી સમન્‍સ પાઠવી વિદેશ મંત્રાલયના મુખ્‍યાલયે બોલાવ્‍યા હતા. ભારતે ઈરાન સમક્ષ આ હુમલા અંગે ઉગ્ર વિરોધ નોંધાવતા બેજવાબદાર લશ્‍કરી કાર્યવાહી બદલ કડક શબ્‍દોમાં જવાબો માંગ્‍યા છે. આ આંતરરાષ્‍ટ્રીય કાયદાઓ અને દરિયાઈ સુરક્ષા પ્રોટોકોલનું ખુલ્લું ઉલ્લંઘન હોવાનું જણાવી ભારતે ઈરાનને સ્‍પષ્ટ ચેતવણી આપી છે કે આંતરરાષ્‍ટ્રીય જળસીમામાં વાણિજ્‍યિક જહાજો અને નાગરિકોની સુરક્ષા સાથે કોઈપણ પ્રકારની બાંધછોડ સ્‍વીકારવામાં નહીં આવે.

હકીકતમાં, પﾍમિ એશિયામાં અમેરિકા અને ઈરાન વચ્‍ચેના સંબંધો ચરમસીમાએ વણસ્‍યા છે. તાજેતરમાં જ યુએસ પ્રમુખ ડોનાલ્‍ડ ટ્રમ્‍પ દ્વારા હોર્મુઝ સ્‍ટ્રેટમાં ઈરાન પર કડક નૌકા નાકાબંધી લાદવાની જાહેરાત કરાયા બાદ અમેરિકાએ ઈરાની ઠેકાણાઓ પર શ્રેણીબદ્ધ એરસ્‍ટ્રાઈક કરી હતી, જેના વળતા પ્રહાર તરીકે ઈરાની સેનાએ અમેરિકા અને તેના સહયોગી દેશો યુએઈ તથા બહેરીન સાથે સંકળાયેલા જહાજોને નિશાન બનાવ્‍યા છે. ચિંતાજનક બાબત એ છે કે આ ભયાનક ભૂરાજકીય જંગમાં અત્‍યાર સુધીમાં ૧૧ ભારતીય નાવિકોએ પોતાના અમૂલ્‍ય જીવ ગુમાવ્‍યા છે, જેમાં ગત મહિને પલાઉના ધ્‍વજવાળા ટેન્‍કર એમટી સેટેબેલો પર અમેરિકાના હુમલામાં માર્યા ગયેલા ત્રણ ભારતીયોનો પણ સમાવેશ થાય છે. ભારત માટે પોતાના લાખો નાવિકોની સુરક્ષા હવે વૈશ્વિક મંચ પર સૌથી મોટો ચિંતાનો વિષય બની ગઈ છે.