સિઓલ, તા.૨૩: દક્ષિણ કોરિયાની રાજધાની સિઓલમાં એક આઘાતજનક અને વિચિત્ર કાનૂની વિવાદ સામે આવ્યો છે. અહીંની એક પ્રખ્યાત ટુ-મિશેલિન-સ્ટાર (2-Michelin Star) રેસ્ટોરન્ટના માલિક અને શેફ સામે ડેઝર્ટમાં ગેરકાયદેસર રીતે કીડીઓનો ગાર્નિશિંગ તરીકે ઉપયોગ કરવા બદલ એક વર્ષની જેલની સજા અને ૨૦ મિલિયન વોન (લગભગ રૂ. ૧૧.૫ લાખ) ના ભારી દંડની માંગ કરવામાં આવી છે. દેશના કડક ખાદ્ય સુરક્ષા નિયમોનું ઉલ્લંઘન કરવા બદલ ફરિયાદી પક્ષે કોર્ટમાં આ કડક સજાની અપીલ કરી છે.
દક્ષિણ કોરિયામાં માત્ર ૧૦ જંતુઓ ખાદ્ય સામગ્રી તરીકે મંજૂર
દક્ષિણ કોરિયાના ખાદ્ય અને ઔષધ સુરક્ષા મંત્રાલયના કાયદા અનુસાર, માનવ વપરાશ માટે તીડ અને ચોક્કસ પ્રજાતિના ક્રિકેટ સહિત માત્ર ૧૦ પ્રકારના જંતુઓને જ ખાવાની મંજૂરી આપવામાં આવી છે. કીડીઓ આ મંજૂર યાદીમાં આવતી નથી.
•    ઓનલાઈન રિવ્યુથી ભાંડો ફૂટ્યો: ગ્રાહકોએ સોશિયલ મીડિયા પર કીડીઓથી સજાવેલા શરબત (Sorbet) ના ફોટા મૂકતાં જ આરોગ્ય અધિકારીઓ હરકતમાં આવ્યા હતા.
•    ૪૯,૦૦૦ કીડીઓની ચાર વર્ષમાં આયાત: તપાસમાં બહાર આવ્યું કે રેસ્ટોરન્ટે અમેરિકા અને થાઇલેન્ડથી લગભગ ૪૯,૦૦૦ કીડીઓ આયાત કરી હતી અને છેલ્લા ચાર વર્ષમાં પોતાના ૧૫-કોર્સ ટેસ્ટિંગ મેનૂમાં હજારો ગ્રાહકોને પીરસી હતી.
ઝેરી તત્વો અને આરોગ્ય સામે મોટું જોખમ
સ્થાનિક મીડિયા 'ધ ચોસુન ડેઇલી' અનુસાર, તપાસકર્તાઓએ શોધી કાઢ્યું કે રેસ્ટોરન્ટ દ્વારા વપરાતી આ કીડીઓમાં સામાન્ય ખાદ્ય જંતુઓની સરખામણીએ ૫૫ ગણા વધુ પ્રમાણમાં 'હેવી મેટલ્સ' (ભારે ધાતુઓ) હાજર હતા, જે ગ્રાહકોના સ્વાસ્થ્ય માટે અત્યંત જોખમી સાબિત થઈ શકે છે.
શેફની દલીલ અને વિશ્વભરનો સંદર્ભ
પોતાના બચાવમાં શેફ અને રેસ્ટોરન્ટ માલિકે દલીલ કરી હતી કે ઓસ્ટ્રેલિયા, ડેનમાર્ક અને બ્રિટન જેવા દેશોની મોંઘી રેસ્ટોરન્ટ્સમાં પણ કીડીઓનો ઉપયોગ થાય છે. ઉપરાંત, તેમણે ગ્રાહકોને કીડી વગરના વિકલ્પો (જેમ કે ખાદ્ય ફૂલો અને સરકો) ની પસંદગી પણ આપી હતી.
જોકે, દક્ષિણ કોરિયાના સત્તાવાળાઓ ખાદ્ય ઝેરીતા અને સ્વચ્છતાના ધોરણો સાથે કોઈ સમાધાન કરવા તૈયાર નથી. આ હાઇ-પ્રોફાઇલ કેસનો આખરી ચુકાદો કોર્ટ દ્વારા ૨ સપ્ટેમ્બરના રોજ સંભળાવવામાં આવશે.