મુંબઈ : માયાનગરી મુંબઈમાં ગઈકાલ રાતથી વરસી રહેલા અવિરત અને મુસળધાર વરસાદે જનજીવનને ભારે અસ્તવ્યસ્ત કરી દીધું છે. આકાશમાંથી જાણે આફત વરસી રહી હોય તેમ આખું શહેર જળબંબોળ બન્યું છે. હવામાન વિભાગે મુંબઈ માટે 'રેડ એલર્ટ' જાહેર કર્યું છે, જેને પગલે પ્રશાસને સાવચેતીના ભાગરૂપે શાળાઓમાં રજા જાહેર કરી દીધી છે અને નાગરિકોને ઘરમાં જ રહેવાની સલાહ આપવામાં આવી છે.
ચાંદીવલીમાં નેતાનો અનોખો વિરોધ
ભારે વરસાદને કારણે ચાંદીવલી વિસ્તારમાં સ્થિતિ અત્યંત ગંભીર બની છે. અહીં રસ્તાઓ પર પાણી ભરાઈ જતા તે કોઈ નદી જેવી સ્થિતિમાં ફેરવાઈ ગયા છે. પાલિકા દ્વારા કરવામાં આવેલી નાળા સફાઈના દાવાઓની પોલ ખૂલતા મહારાષ્ટ્ર નવનિર્માણ સેનાના વરિષ્ઠ નેતા મહેન્દ્ર ભાનુશાલીએ આકરા પાણીએ વિરોધ દર્શાવ્યો હતો. તેમણે પાણીમાં ટાયરની મોટી ટ્યુબ નાખીને તેના પર બેસી જઈ પાલિકાના કોન્ટ્રાક્ટરો અને તંત્રની કામગીરી સામે તીખા સવાલો ઉઠાવ્યા હતા.
ગ્રાઉન્ડ ઝીરો પર મેયર, મદદ માટે તંત્ર ખડેપગે
સ્થિતિની ગંભીરતાને જોતા મુંબઈ મહાનગરપાલિકાના મેયર રીતુ તાવડે પોતે ગ્રાઉન્ડ ઝીરો પર ઉતર્યા હતા. જળબંબોળ થયેલા વિસ્તારોમાં તેમણે જાતે ફરીને પરિસ્થિતિની સમીક્ષા કરી હતી. પાલિકાના કર્મચારીઓની ટીમો વિવિધ વિસ્તારોમાં તૈનાત કરવામાં આવી છે, જેઓ પાણીના નિકાલ અને નાગરિકોને સલામત સ્થળે ખસેડવાની કામગીરી કરી રહ્યા છે. અનેક નીચાણવાળા વિસ્તારો અને સોસાયટીઓમાં પાણી ઘૂસી જતાં ઘરવખરીને મોટું નુકસાન થયું હોવાના અહેવાલ છે.
૬ જુલાઈ સુધી રૌદ્ર સ્વરૂપ યથાવત
હવામાન વિભાગના જણાવ્યા અનુસાર, મુંબઈમાં આગામી ૬ જુલાઈ સુધી ચોમાસાનું આ રૌદ્ર સ્વરૂપ યથાવત રહેશે. કાળાડિબાંગ વાદળો અને સતત વરસાદને કારણે શહેર પર સંકટના વાદળો છવાયેલા છે. વરસાદનો વેગ હજુ વધવાની શક્યતા હોવાથી તંત્ર હાઈ-એલર્ટ પર છે. મુંબઈગરાઓ માટે આવનારા બે દિવસ અત્યંત પડકારજનક સાબિત થઈ શકે છે, કારણ કે વરસાદના કારણે ટ્રાફિક વ્યવસ્થા અને લોકલ ટ્રેનની સેવાઓ પર પણ માઠી અસર પડી રહી છે.