મુંબઈ: માયાનગરી મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટ પર કસ્ટમ વિભાગે ડ્રગ્સની હેરાફેરી વિરુદ્ધ એક મોટી સર્જિકલ સ્ટ્રાઈક કરી છે. બેંગકોકથી ભારત આવેલા એક મુસાફરની બેગમાંથી કરોડો રૂપિયાનું નશીલું દ્રવ્ય મળી આવતા એરપોર્ટ પર દોડધામ મચી ગઈ હતી. આ ઓપરેશન દ્વારા કસ્ટમ અધિકારીઓએ આંતરરાષ્ટ્રીય ડ્રગ સિન્ડિકેટના મનસૂબા પર પાણી ફેરવી દીધું છે.
સૂટકેસ ખોલતા જ અધિકારીઓ સ્તબ્ધ
પ્રાપ્ત વિગતો અનુસાર, કસ્ટમ વિભાગને અગાઉથી મળેલી બાતમી અને મુસાફરની શંકાસ્પદ હિલચાલને આધારે બેંગકોકથી મુંબઈ ઉતરેલા અમિત શંકર ભક્તિયારપુરી નામના શખ્સને અટકાવવામાં આવ્યો હતો. જ્યારે તેના સામાનની ઝીણવટભરી તપાસ કરવામાં આવી ત્યારે અધિકારીઓ પણ ચોંકી ઉઠ્યા હતા. તેની બેગમાંથી આશરે 10.056 કિલોગ્રામ ઉચ્ચ ગુણવત્તાનું 'હાઈડ્રોપોનિક વીડ' મળી આવ્યું હતું.
₹10 કરોડથી વધુની કિંમતનું ઘાતક ડ્રગ્સ
જપ્ત કરવામાં આવેલા આ ડ્રગ્સની આંતરરાષ્ટ્રીય બજારમાં કિંમત ₹10 કરોડથી વધુ હોવાનું અંદાજવામાં આવી રહ્યું છે. નિષ્ણાતોના મતે, હાઈડ્રોપોનિક વીડ એ સામાન્ય ગાંજા કરતા અનેકગણું વધુ ઘાતક અને મોંઘું હોય છે. ખાસ કરીને મેટ્રો શહેરોમાં યોજાતી હાઈ-પ્રોફાઈલ પાર્ટીઓમાં આ પ્રકારના નશાની ભારે માંગ રહેતી હોય છે. કસ્ટમ વિભાગે આટલી મોટી ખેપ પકડીને નશાના વેપારીઓને મોટો આર્થિક ફટકો માર્યો છે.
આરોપી જેલના સળિયા પાછળ, તપાસ તેજ
આરોપી અમિતની 10 એપ્રિલના રોજ ધરપકડ કરવામાં આવી હતી અને તેને તાત્કાલિક કોર્ટમાં રજૂ કરાયો હતો. ગુનાની ગંભીરતાને જોતા કોર્ટે આરોપીને 14 દિવસની ન્યાયિક કસ્ટડીમાં મોકલવાનો આદેશ આપ્યો છે. હાલમાં કસ્ટમ વિભાગ અને નાર્કોટિક્સ કંટ્રોલ બ્યુરો એ તપાસ કરી રહ્યા છે કે આ ડ્રગ્સ મુંબઈમાં કોને પહોંચાડવાનું હતું? શું અમિત માત્ર એક ‘કુરિયર’ છે કે આ આંતરરાષ્ટ્રીય ગેંગનો સક્રિય સભ્ય? આ નેટવર્કના મૂળ ક્યાં સુધી ફેલાયેલા છે તેની પૂછપરછ શરૂ કરી દેવામાં આવી છે.
મુંબઈ એરપોર્ટ પર કસ્ટમ્સની આ સતર્કતાને કારણે એક મોટી નશીલા પદાર્થોની ખેપ બજારમાં પહોંચતા અટકી ગઈ છે. એજન્સીઓ હવે એરપોર્ટ પર આવતી તમામ આંતરરાષ્ટ્રીય ફ્લાઈટ્સ પર બાજ નજર રાખી રહી છે.