નવી દિલ્હી : બ્રિક્સ (BRICS) સમિટ દરમિયાન ભારતના વડા પ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગ વચ્ચે યોજાયેલી ઉચ્ચ-સ્તરીય દ્વિપક્ષીય બેઠક સંદર્ભે ભારતીય વિદેશ મંત્રાલયે (MEA) એક સત્તાવાર નિવેદન બહાર પાડ્યું છે. વિદેશ મંત્રાલયના પ્રવક્તા રણધીર જયસ્વાલે પત્રકાર પરિષદમાં વિગતો આપતા જણાવ્યું હતું કે, બંને દેશો વચ્ચે ભારત-ચીન દ્વિપક્ષીય સંબંધોને સુધારવા માટે પરસ્પર આદર, પરસ્પર હિત અને પરસ્પર સંવેદનશીલતા પર સર્વસંમતિ સધાઈ છે. પીએમ નરેન્દ્ર મોદીએ ભારતની સુરક્ષા અને સરહદી ચિંતાઓને અગ્રતા સાથે રજૂ કરી હતી અને ભારપૂર્વક જણાવ્યું હતું કે બંને પક્ષોએ એકબીજાના મુખ્ય સાર્વભૌમ હિતો અને ચિંતાઓ પ્રત્યે સંવેદનશીલતા દર્શાવવી અનિવાર્ય છે.

પત્રકાર પરિષદ દરમિયાન વિદેશ મંત્રાલયે ઓમાનના દરિયાકાંઠે વાણિજ્યિક જહાજ 'MT El Gaia' પર થયેલા તાજેતરના હુમલા અંગે પણ વિગતો આપી હતી. રણધીર જયસ્વાલે જણાવ્યું કે આ ઘટના બાદ ૧૩ ભારતીય નાગરિકો/નાવિકોને સફળતાપૂર્વક બચાવી લેવામાં આવ્યા છે, જ્યારે એક ભારતીય નાગરિક હજુ પણ ગુમ છે. ભારત સરકારે ભારતીય નાગરિકોને બચાવવાના ઝડપી પ્રયાસો બદલ ઓમાની સત્તાવાળાઓનો આભાર માન્યો હતો. આ ઉપરાંત, બાંગ્લાદેશના વડા પ્રધાન તારિક રહેમાનની હાજરી અંગે તેમણે સ્પષ્ટ કર્યું કે તેમને દ્વિપક્ષીય મુલાકાત ઉપરાંત BIMSTEC ના અધ્યક્ષ તરીકે BRICS સમિટમાં ભાગ લેવા માટે બે અલગ-અલગ આમંત્રણ મોકલવામાં આવ્યા હતા.

બીજી તરફ, પાકિસ્તાન દ્વારા જૈશ-એ-મોહમ્મદ (JeM) ના આતંકવાદી મસૂદ અઝહર પર PKR ૭૦ લાખના ઇનામની જાહેરાત સામે ભારતે આકરો પ્રહાર કર્યો છે. MEA પ્રવક્તાએ જણાવ્યું હતું કે, વિશ્વને અને આંતરરાષ્ટ્રીય સમુદાયને મૂર્ખ બનાવવાના પાકિસ્તાનના આવા ગતકડાં કંઈ નવા નથી. પાકિસ્તાને માત્ર કાગળ પર ઈનામો જાહેર કરીને નાટક કરવાને બદલે આતંકવાદીઓ સામે નક્કર અને પરિણામલક્ષી કાનૂની પગલાં લેવા જોઈએ.