લખનૌ : ઉત્તર પ્રદેશના રાજકારણમાં અને બહુજન સમાજ પાર્ટી (BSP) ના આંતરિક વર્તુળોમાં ગરમાવો લાવતાં પાર્ટી સુપ્રીમો માયાવતીએ શુક્રવારે એક મહત્વપૂર્ણ સ્પષ્ટતા કરી છે. બસપાના રાષ્ટ્રીય સંયોજક અને તેમના ભત્રીજા આકાશ આનંદની ઉમેદવાર પસંદગીમાં ભૂમિકા અંગે ચાલી રહેલી તમામ અટકળો અને અફવાઓનો અંત લાવતા માયાવતીએ સ્પષ્ટ શબ્દોમાં જણાવ્યું છે કે આગામી ઉત્તર પ્રદેશ વિધાનસભા ચૂંટણી માટે પાર્ટીના ઉમેદવારો નક્કી કરવાનો આખરી નિર્ણય માત્ર અને માત્ર તેમનો જ રહેશે.

સોશિયલ મીડિયા પ્લેટફોર્મ X (અગાઉ ટ્વિટર) પર શ્રેણીબદ્ધ પોસ્ટ્સ શેર કરતા ઉત્તર પ્રદેશના પૂર્વ મુખ્યમંત્રીએ જણાવ્યું હતું કે, તેમણે લખનૌ સ્થિત પાર્ટીના રાજ્ય કાર્યાલયમાં ઉચ્ચ-સ્તરીય સમીક્ષા બેઠકો યોજી છે. પક્ષના પદાધિકારીઓ અને વરિષ્ઠ નેતાઓ સાથે વિગતવાર ચર્ચા-વિચારણા કર્યા બાદ તેમણે જાતે બે ડઝનથી વધુ ઉમેદવારોના નામ પહેલાથી જ આખરી કરી દીધા છે. તેમણે મીડિયા અને સોશિયલ મીડિયા પર ચાલતા ભ્રામક અહેવાલોને સંપૂર્ણપણે પાયાવિહોણા ગણાવ્યા હતા.

માયાવતીનો કડક સંદેશ: "દેશના કોઈપણ રાજ્યમાં લોકસભા કે વિધાનસભા ચૂંટણી હોય, ઉમેદવારોની આખરી પસંદગી કરવાનો અધિકાર હંમેશા બસપા નેતૃત્વ એટલે કે મારો જ રહેશે. આકાશ આનંદને માત્ર એ જ ઉમેદવારોના નામોની જાહેરાત કરવાની અને સભાઓ યોજવાની જવાબદારી સોંપાઈ છે જેમને મેં અગાઉથી મંજૂરી આપી દીધી હોય."

માયાવતીએ સ્પષ્ટ કર્યું કે આકાશ આનંદ રાષ્ટ્રીય સંયોજક તરીકે સંગઠનને મજબૂત કરવાનું અને પાર્ટીના વિચારધારા આધારિત કાર્યક્રમોનું આયોજન કરવાનું કામ કરી રહ્યા છે. બસપા સુપ્રીમોએ પક્ષના કાર્યકરો અને સમર્થકોને અપીલ કરી હતી કે સોશિયલ મીડિયા પર ખોટી માહિતી અને અફવાઓ ફેલાવતા તોફાની તથા જાતિવાદી તત્વોથી સાવધ રહે અને પાર્ટી સંગઠનને મજબૂત કરવા પર ધ્યાન કેન્દ્રિત કરે.