મથુરા:  ધાર્મિક નગરી મથુરામાં યમુના નદીના કિનારે ભક્તિનું વાતાવરણ પળવારમાં માતમમાં ફેરવાઈ ગયું છે. શુક્રવારે વૃંદાવનના કેશીઘાટથી દેવરાહા બાબાના દર્શન કરવા જઈ રહેલી ૩૭ શ્રદ્ધાળુઓથી ભરેલી મોટરબોટ પોન્ટૂન પુલ સાથે અથડાઈને પલટી ગઈ હતી. આ ભયાનક અકસ્માતમાં અત્યાર સુધીમાં કુલ ૧૧ મૃતદેહો મળી આવ્યા છે, જેમાં શનિવારે સવારે પંજાબના માણિક ટંડનનો મૃતદેહ પણ હાથ લાગ્યો છે. NDRF અને SDRFની ટીમોએ શનિવારે વહેલી સવારે ૫:૩૦ વાગ્યાથી ૨૦ મોટરબોટ સાથે નદીના ૧૦ કિલોમીટરના વિસ્તારમાં ફરીથી બચાવ કામગીરી શરૂ કરી છે, કારણ કે હજુ પણ સાત શ્રદ્ધાળુઓ લાપતા છે.

આ અકસ્માત એટલો હૃદયદ્રાવક હતો કે હોડી પલટતાની સાથે જ શ્રદ્ધાળુઓમાં નાસભાગ અને ચીસાચીસ મચી ગઈ હતી. સ્થાનિક ડાઇવર્સની મદદથી ૨૨ લોકોને સુરક્ષિત બહાર કાઢવામાં આવ્યા હતા, પરંતુ તેજ પ્રવાહ હોવાને કારણે ઘણા લોકો વહેણમાં તણાઈ ગયા હતા. જે પરિવારોના સભ્યો હજુ ગુમ છે, તેઓ યમુનાના કિનારે આંખમાં આંસુ સાથે પોતાના સ્વજનોના કોઈ સમાચાર મળે તેની આશામાં બેઠા છે. વહીવટીતંત્ર શરૂઆતમાં ગુમ થયેલા લોકોની સંખ્યા ઓછી ગણાવતું હતું, પરંતુ પરિવારજનોની વિગતો બાદ હવે સાત લોકો હજુ પણ નદીમાં હોવાનું માનવામાં આવે છે.

બીજી તરફ, પંજાબના લુધિયાણા અને જાગરાંથી આવેલા આ શ્રદ્ધાળુઓના પરિવારમાં શોકનું મોજું ફરી વળ્યું છે. ગઈકાલે મોડી રાત્રે પોસ્ટમોર્ટમ બાદ ૧૦ મૃતકોના મૃતદેહોને ખાસ એમ્બ્યુલન્સ દ્વારા પંજાબ મોકલવામાં આવ્યા હતા. લુધિયાણામાં આજે સવારે ૧૦ વાગ્યે જ્યારે મૃતદેહો પહોંચ્યા ત્યારે આખા વિસ્તારમાં આક્રંદ જોવા મળ્યો હતો. મથુરાના ડીએમ સીપી સિંહે આ ગંભીર બેદરકારીની તપાસના આદેશ આપ્યા છે. પોન્ટૂન પુલને જોડતી વખતે સર્જાયેલી આ ખામી કે માનવીય ભૂલ, તેની તપાસ એડીએમ પંકજ વર્માને સોંપવામાં આવી છે.