થાણે : મહારાષ્ટ્રના થાણે જિલ્લામાંથી એક મોટી દુર્ઘટનાના સમાચાર સામે આવ્યા છે. થાણેના દિવા-શિળ રોડ પર આવેલા ખર્ડી ગામમાં પેટ્રોલ પંપ નજીક આવેલા અરશદ કમ્પાઉન્ડમાં ગુરુવારે સવારે અચાનક આગ લાગવાની ઘટના બની હતી. સવારના આશરે ૧૦:૩૦ વાગ્યાના સુમારે ગોડાઉનોમાં શરૂ થયેલી આ આગે જોતજોતામાં વિકરાળ સ્વરૂપ ધારણ કરી લીધું હતું. આગની ભીષણતા એટલી બધી હતી કે આસપાસના વિસ્તારમાં કાળા ડિબાંગ ધુમાડાના ગોટેગોટા જોવા મળ્યા હતા, જેના કારણે સ્થાનિક રહેવાસીઓમાં થોડા સમય માટે ભયનો માહોલ છવાઈ ગયો હતો.

ઘટનાની જાણ થતા જ થાણે ફાયર બ્રિગેડનું તંત્ર તાત્કાલિક હરકતમાં આવ્યું હતું. ફાયર વિભાગ દ્વારા હાઈરાઈઝ ફાયર વ્હીકલ, ફાયર એન્જિન અને વોટર ટેન્કર સહિતની અત્યાધુનિક ઇમરજન્સી રિસ્પોન્સ ટીમોને ત્વરિત ઘટનાસ્થળે રવાના કરવામાં આવી હતી. ફાયર જવાનોની ભારે જહેમત બાદ બપોરે આશરે ૨:૧૦ વાગ્યા સુધીમાં આ ભીષણ આગ પર સંપૂર્ણપણે કાબૂ મેળવી લેવામાં આવ્યો હતો. આગ બુયા બાદ પણ કૂલિંગ ઓપરેશન મોડે સુધી ચાલુ રાખવામાં આવ્યું હતું જેથી આગ ફરીથી ન ભડકે.

આ અકસ્માતમાં મોટા પ્રમાણમાં આર્થિક નુકસાન થયું હોવાનું સામે આવ્યું છે. પ્રાપ્ત વિગતો મુજબ, આગમાં આશરે ૮૦૦ સ્કવેર ફૂટમાં ફેલાયેલું ફર્નિચરનું ગોડાઉન, અન્ય ૮૦૦ સ્કવેર ફૂટમાં આવેલું પ્લાસ્ટિકના ભંગારનું ગોડાઉન તેમજ ૧,૫૦૦ સ્કવેર ફૂટ વિસ્તારમાં ફેલાયેલું ફેબ્રિકેશનના સામાનનું ગોડાઉન સંપૂર્ણપણે બળીને ખાખ થઈ ગયા હતા. જોકે, સૌથી રાહતની વાત એ રહી કે આટલી મોટી દુર્ઘટના સર્જાવા છતાં સદ્નસીબે કોઈ જાનહાનિ થઈ નહોતી કે કોઈ ઇજાગ્રસ્ત થયું નહોતું. હાલ પ્રશાસન દ્વારા આગ લાગવાનું ચોક્કસ કારણ જાણવા માટે સઘન તપાસ હાથ ધરવામાં આવી છે.