નવી દિલ્હી, તા.૧૭: ભારતની સૌથી મોટી કાર નિર્માતા કંપની મારુતિ સુઝુકી એક મોટા કાનૂની વિવાદમાં ફસાઈ છે. ગ્રાહક સુરક્ષા ફોરમ (Consumer Forum) દ્વારા ગ્રાહકની ખામીયુક્ત કારને સંપૂર્ણપણે બદલી આપવા અથવા તેના પૈસા વ્યાજ સાથે પરત કરવાના આપેલા આદેશને મારુતિ સુઝુકી હવે હાઈકોર્ટમાં પડકારવા જઈ રહી છે. કંપનીએ આ મામલે ગ્રાહક સુરક્ષા ફોરમના નિર્ણયને પક્ષપાતી ગણાવીને ઇંધણમાં ભેળસેળ (Fuel Contamination) અને E20 પેટ્રોલના ખોટા વપરાશનો ગંભીર મુદ્દો ઉઠાવ્યો છે, જેને કારણે ઓટોમોબાઈલ સેક્ટરમાં ખળભળાટ મચી ગયો છે.

શું છે સમગ્ર વિવાદ? ગ્રાહકે લગાવ્યો હતો ગંભીર આરોપ

આ વિવાદની શરૂઆત ત્યારે થઈ જ્યારે એક ગ્રાહકે મારુતિ સુઝુકીની નવી કાર ખરીદી, પરંતુ થોડા જ સમયમાં કારના એન્જિનમાં ગંભીર ખામી સર્જાઈ અને કાર રસ્તા વચ્ચે બંધ પડી ગઈ. ગ્રાહકનો આરોપ હતો કે કારમાં ઉત્પાદન સંબંધિત ખામી (Manufacturing Defect) હતી અને કંપનીએ તેને ખામીયુક્ત એન્જિનવાળી ગાડી પધરાવી દીધી હતી. ગ્રાહકની ફરિયાદના આધારે કન્ઝ્યુમર ફોરમે મારુતિ સુઝુકીને ગ્રાહકની કાર નવી કાર સાથે બદલી આપવાનો અથવા સંપૂર્ણ રકમ રિફંડ કરવાનો કડક આદેશ આપ્યો હતો.

કંપનીનો બચાવ: એન્જિન ફેઇલ્યોર માટે કંપની નહીં, પેટ્રોલ પંપ જવાબદાર

કન્ઝ્યુમર ફોરમના આ નિર્ણય સામે મારુતિ સુઝુકીએ આક્રમક વલણ અપનાવ્યું છે. કંપનીના કાનૂની નિષ્ણાતોએ કોર્ટમાં રજૂઆત કરતા જણાવ્યું છે કે કારના એન્જિનમાં કોઈ ઉત્પાદન ખામી નહોતી. એન્જિન ફેલ થવાનું મુખ્ય કારણ એ હતું કે કારમાં જે પેટ્રોલ વાપરવામાં આવ્યું હતું તેમાં ભારે ભેળસેળ હતી. પાણી અને અન્ય કેમિકલના મિશ્રણવાળા ઇંધણને કારણે એન્જિન જામ થઈ ગયું હતું.

આ ઉપરાંત કંપનીએ E20 (૨૦% ઇથેનોલ મિશ્રિત પેટ્રોલ) ઇંધણના માપદંડોનો પણ ઉલ્લેખ કર્યો છે. કંપનીના જણાવ્યા અનુસાર, જો ગ્રાહક નિયત માપદંડ સિવાયનું અથવા ભેળસેળયુક્ત ઇંધણ કારમાં ભરે છે, તો તેની જવાબદારી કાર બનાવતી કંપનીની રહેતી નથી.

ઓટોમોબાઈલ ઇન્ડસ્ટ્રી માટે મોટો ટર્નિંગ પોઇન

મારુતિ સુઝુકીનો આ નિર્ણય માત્ર એક ગ્રાહક પૂરતો મર્યાદિત નથી, પરંતુ તે સમગ્ર ઓટોમોબાઈલ ઇન્ડસ્ટ્રી માટે એક મિસાલ બની શકે છે. જો હાઈકોર્ટ મારુતિ સુઝુકીની દલીલને માન્ય રાખશે, તો ભવિષ્યમાં કાર બગડવા પર કંપનીઓ ગ્રાહકોના માથે અથવા પેટ્રોલ પંપો પર દોષનો ટોપલો ઢોળીને વોરંટી આપવાનો ઇનકાર કરી શકે છે.

હાલમાં મારુતિ સુઝુકી આ કેસને ઉચ્ચ ન્યાયાલયમાં લઈ જવા માટેના તમામ દસ્તાવેજો અને લેબોરેટરીના ફ્યુઅલ ટેસ્ટિંગ રિપોર્ટ્સ તૈયાર કરી રહી છે. હવે જોવાનું એ રહેશે કે હાઈકોર્ટ ગ્રાહકના પક્ષમાં નિર્ણય જાળવી રાખે છે કે મારુતિ સુઝુકીના 'ભેળસેળયુક્ત પેટ્રોલ'ના તર્કને સ્વીકારે છે.