કેલિફોર્નિયા :  સોશિયલ મીડિયાની દુનિયામાં ફેસબુક અને ઇન્સ્ટાગ્રામથી રાજ કરનાર મેટા હવે માત્ર ચેટબોટ પૂરતી સીમિત ન રહેતાં AIની દુનિયામાં એક નવો ઈતિહાસ રચવા જઈ રહી છે. મેટા કનેક્ટ ૨૦૨૬ ઈવેન્ટ દરમિયાન મેટાના સીઈઓ માર્ક ઝુકરબર્ગે 'Muse AI' અને તેનું પોકેટ ઉપકરણ 'Muse Charm' લોન્ચ કરીને સમગ્ર ટેક જગતમાં ખળભળાટ મચાવી દીધો છે. આ માત્ર પ્રશ્નોના જવાબ આપતો સામાન્ય ચેટબોટ નથી, પરંતુ એક સંપૂર્ણ 'પર્સનલ સુપરઈન્ટેલિજન્સ એજન્ટ' છે, જે વપરાશકર્તા વતી ઇમેઇલ મોકલવાથી લઈને મુસાફરીની ટિકિટ બુકિંગ, ઓનલાઈન શોપિંગ અને કૉલ્સ પણ સહેલાઈથી કરી શકે છે. Muse ના આ ધમાકેદાર આગમન સાથે જ રોકાણકારોમાં ભારે ઉત્સાહ જોવા મળ્યો હતો, જેના કારણે મેટાના માર્કેટ કેપમાં લગભગ ૨૦૦ બિલિયન ડોલરનો ઉછાળો આવ્યો હતો અને ઝુકરબર્ગની વ્યક્તિગત નેટવર્થ એક જ દિવસમાં આશરે ૨૫ બિલિયન ડોલર વધી ગઈ હતી.

મેટાની આ નવી વ્યૂહરચના માત્ર સોફ્ટવેર પૂરતી મર્યાદિત નથી, પરંતુ કંપની હાર્ડવેર અને AIનું એક મજબૂત ઈકોસિસ્ટમ તૈયાર કરી રહી છે. Meta Connect માં Muse AI ને નવા AI ચશ્મા તેમજ રે-બેન મેટા (Ray-Ban Meta Gen 3) સાથે સંકલિત (Integrate) કરવાની જાહેરાત કરવામાં આવી છે, જેનાથી ભવિષ્યમાં કામ કરવા માટે ફોન સ્ક્રીન જોવાની જરૂર જ નહીં પડે. આ ઈવેન્ટમાં રજૂ કરાયેલું ૪૩ ગ્રામનું ઓપન-ઈયર ઓડિયો ચશ્મા અને નાનું ‘Muse Charm’ ઉપકરણ વપરાશકર્તાઓને બેકગ્રાઉન્ડમાં કામ કરતા તેમના પર્સનલ એજન્ટ સાથે રિયલ-ટાઈમ વોઈસ મોડેલ દ્વારા વાર્તાલાપ કરવાની સુવિધા આપે છે. એટલે કે, જ્યારે Muse તમારું કામ પૃષ્ઠભૂમિમાં પૂરું કરી રહ્યું હશે, ત્યારે તમારે સ્ક્રીન સામે સતત બેસી રહેવાની કોઈ જરૂર રહેશે નહીં.

તમારા વતી ઈમેઈલ વાંચવા, ખરીદી કરવી કે બેંકિંગ વ્યવહારો કરવા જેવા કાર્યોમાં ડેટા પ્રાઈવસી અને સુરક્ષાનો મોટો પ્રશ્ન ઊભો થાય છે, પરંતુ મેટાએ તેને પહોંચી વળવા માટે 'Muse Secure VM' આર્કિટેક્ચર રજૂ કર્યું છે. આ સુરક્ષા સિસ્ટમ વપરાશકર્તાના ડેટા અને AI ને એક અલગ વર્ચ્યુઅલ કમ્પ્યુટરમાં રાખે છે, જેથી પાસવર્ડ કે પેમેન્ટ સંબંધી સંવેદનશીલ વિગતોનો સીધો પ્રવેશ AI પાસે ન રહે. કોઈપણ મહત્વપૂર્ણ કે સંવેદનશીલ નિર્ણય લેતા પહેલા Muse વપરાશકર્તાની સ્પષ્ટ સંમતિ માગે છે. એક તરફ OpenAI અને Google જેવા દિગ્ગજો AI મોડેલ્સની રેસમાં છે, તો બીજી તરફ હાર્ડવેર, ઓપન-ઈયર ડિવાઈસીસ અને પર્સનલ એજન્ટનું આ જોડાણ કરીને ઝુકરબર્ગે સ્પષ્ટ કરી દીધું છે કે ભવિષ્યના ડિજિટલ યુગમાં મેટા સૌથી આગળ રહેવા તૈયાર છે.