જાલના : મહારાષ્ટ્રમાં મરાઠા આરક્ષણના મુદ્દે ચાલી રહેલું આંદોલન હવે અત્યંત નિર્ણાયક તબક્કામાં પ્રવેશ્યું છે. મરાઠા આરક્ષણ કાર્યકર્તા મનોજ જરાંગે પાટીલે શનિવારે તેમના અનશનના આઠમા દિવસે પાણી, ઇન્ટ્રાવેનસ ફ્લૂઇડ અને કોઈપણ પ્રકારની તબીબી સારવાર લેવાનો સ્પષ્ટ ઇનકાર કરી દીધો છે. તેમના આ કડક રૂખના કારણે રાજ્ય સરકાર પર દબાણ વધી ગયું છે.

મનોજ જરાંગે પાટીલે ગત ૨૯ ઓગસ્ટથી મહારાષ્ટ્રના જાલના જિલ્લાના અંતરવાલી સરાટી ગામમાં અનશન શરૂ કર્યું હતું. તેઓ મરાઠા સમાજ માટે આરક્ષણ અને પાત્ર સમુદાયના સભ્યો માટે કુનબી જાતિ પ્રમાણપત્ર મેળવવાની માંગ કરી રહ્યા છે. વિરોધ સ્થળ પર મોટી સંખ્યામાં સમર્થકો એકઠા થયા છે અને તેમના આંદોલનને પૂરતો ટેકો આપી રહ્યા છે.

પત્રકારો સાથે વાતચીત કરતા મનોજ જરાંગે પાટીલે જણાવ્યું હતું કે આ વખતે આંદોલનનું પરિણામ બિલકુલ અલગ આવશે. તેમણે સ્પષ્ટ શબ્દોમાં કહ્યું કે તેઓ કોઈપણ ભོગે મરાઠા સમુદાય માટે આરક્ષણ સુરક્ષિત કરવા માંગે છે. સરકાર પર પ્રહાર કરતા તેમણે કહ્યું કે મરાઠા સમાજના મૂળ અસ્તિત્વ પર આ રીતે હુમલો કરવો યોગ્ય નથી અને સમાજને તેનો હક્ક મળવો જ જોઈએ.

પોતાની જીદ પર અડગ રહેતા તેમણે કહ્યું કે સરકાર દ્વારા તમામ માંગણીઓ પૂરી કરવામાં ન આવે ત્યાં સુધી તેઓ મરણપર્યંત ઉપવાસ ચાલુ રાખશે. તેમણે ૧૧ સપ્ટેમ્બર સુધીનો સમય આપ્યો છે અને કહ્યું છે કે આ સમયગાળા દરમિયાન તમામ માંગણીઓનું પાલન થવું જોઈએ. જો સરકાર તમામ માંગણીઓ સ્વીકારી લેશે, તો મરાઠા સમુદાય મુંબઈમાં ગુલાલ ઉડાડશે અને વિજય સરઘસ કાઢશે.

મનોજ જરાંગે પાટીલે આ ચાલતા સંઘર્ષને પોતાનું છેલ્લું આંદોલન ગણાવ્યું છે. તેમણે કહ્યું કે જો આ માંગણીઓનો અમલ થઈ જશે, તો સમાજને ભવિષ્યમાં ક્યારેય આંદોલન કરવાની જરૂર રહેશે નહીં. અગાઉ કેટલાક નેતાઓની સમજાવટ બાદ તેમણે પાણી અને દવાઓ લીધી હતી, પરંતુ હવે તેમણે ફરીથી આક્રમક વલણ અપનાવતા તમામ પ્રકારની તબીબી મદદ લેવાનો ઇનકાર કરી દીધો છે.