જાલના, તા.૧૫: મરાઠા અનામત આંદોલનના મુખ્ય નેતા મનોજ જરાંગે-પાટીલે સરકાર સામે આરપારના જંગનું એલાન કરી દીધું છે. અનિશ્ચિત મુદતના ઉપવાસના ૧૮મા દિવસે મંગળવારે તેઓ જાલના જિલ્લાના અંતરવાલી સારાટીથી મુંબઈ તરફ રવાના થયા હતા. આઝાદ મેદાનમાં પ્રસ્તાવિત આંદોલન માટે મુંબઈ પોલીસની પરવાનગી અંગે હજુ અનિશ્ચિતતા સેવાઈ રહી છે, તેમ છતાં જરાંગે-પાટીલ તેમના મક્કમ નિર્ધાર સાથે મુંબઈ આવવા નીકળી પડ્યા છે. ૧૭ દિવસથી ભૂખહડતાળ પર હોવાના કારણે તેઓ શારીરિક રીતે દેખીતી રીતે ખૂબ જ અશક્ત અને નબળા જણાઈ રહ્યા હતા, પરંતુ તેમનો જુસ્સો બુલંદ દેખાતો હતો.

અંતરવાલી સારાટીથી રવાના થતાં પહેલાંના દ્રશ્યો અત્યંત આહલાદક અને ભાવુક હતા. જરાંગે-પાટીલે છત્રપતિ શિવાજી મહારાજની પ્રતિમાને શીશ નમાવ્યું હતું અને સ્થાનિક હનુમાન મંદિરમાં પૂજા-અર્ચના કરી હતી. આ સમયે ઉપસ્થિત મહિલા સમર્થકોએ તેમની આરતી ઉતારી આશીર્વાદ આપ્યા હતા. ટ્રેક્ટર પર શિવાજી મહારાજની વિશાળ આદમકદ પ્રતિમા સાથે લક્ઝરી SUV કાર્સ, પોલીસ વાહનો અને એમ્બ્યુલન્સનો મોટો કાફલો રવાના થયો હતો, જેને વિદાય આપવા માટે હજારો સમર્થકોનો જનસાગર રોડ પર ઉમટી પડ્યો હતો. માર્ગમાં તેમણે રાજકારણીઓ પર મરાઠા સમુદાય સાથે છેતરપિંડીનો આરોપ લગાવીને કહ્યું હતું કે, "આ લડાઈ અમારા બાળકોના ભવિષ્ય માટે છે અને અમે સરકાર સામે ક્યારેય ઝૂકીશું નહીં."

અગાઉની યોજના મુજબ જરાંગે ૧૯ સપ્ટેમ્બરે આઝાદ મેદાન ખાતે આંદોલન શરૂ કરનાર છે. જોકે, ગણેશોત્સવ અને સુરક્ષાના કારણોસર મુંબઈ પોલીસે તેમની અરજી બે વાર ફગાવી દીધી છે. આથી હવે માત્ર ૫૦ લોકો સાથે વિરોધ પ્રદર્શન કરવા માટે ત્રીજી અરજી કરવામાં આવી છે. જરાંગેએ સ્પષ્ટતા કરી છે કે જો પોલીસ પરવાનગી નહીં આપે તો તેઓ બોમ્બે હાઈકોર્ટના દરવાજા ખટખટાવશે. બીજી તરફ તેમણે તબીબી સારવાર અને સલાઈન લેવાનું પણ બંધ કરી દેતાં તેમની તબિયત વધુ લથડી છે. બીડ, અહલ્યાનગર અને પુણે થઈને મુંબઈ પહોંચનારા આ કાફલા અને જરાંગેના આકરા વલણને પગલે હવે રાજ્ય સરકાર શું પગલાં ભરે છે તેના પર આખા મહારાષ્ટ્રની નજર ટકેલી છે.