દિલ્હી : દિલ્હી-દહેરાદૂન ઈકોનોમિક કોરિડોર પરથી એક અત્યંત વિચિત્ર અને વાયરલ ચોરીનો કિસ્સો સામે આવ્યો છે, જેને જોઈને લોકો આશ્ચર્યચકિત થઈ ગયા છે. ઉત્તર પ્રદેશના બાગપત જિલ્લામાં અગ્રવાલ મંડી તતીરી અને બરોત વચ્ચેના એક્સપ્રેસવે પર એક શખ્સે પોતાની લક્ઝરી સફેદ કાર રસ્તા વચ્ચે રોકીને હાઈવેની સુંદરતા વધારવા માટે વાવેલો છોડ જમીનમાંથી ઉખેડી લીધો હતો અને કારમાં મૂકીને આરામથી નીકળી ગયો હતો. આ સમગ્ર શરમનાક ઘટના રસ્તા પર લાગેલા CCTV કેમેરામાં કેદ થઈ ગઈ હતી.

'POLICE' ના સ્ટીકરવાળી કાર અને કોઈ પણ ઉતાવળ વગરની 'રોયલ' ચોરી

CCTV ફૂટેજમાં જોઈ શકાય છે કે એક સફેદ રંગની કાર હાઈવે કિનારે આવીને ઊભી રહે છે. તેમાંથી એક વ્યક્તિ બહાર નીકળે છે અને જાણે પોતાનું જ ખેતર હોય તેમ આરામથી રસ્તાની બાજુમાં વાવેલા છોડ પાસે જાય છે. તે નીચે નમીને છોડને મૂળમાંથી ઉખેડે છે અને કોઈ પણ ડર કે ઉતાવળ વગર તેને પોતાની કારની અંદર મૂકીને રવાના થઈ જાય છે. સૌથી ચોંકાવનારી બાબત એ છે કે આ કાર પર 'POLICE' લખેલું સ્ટીકર મારેલું દેખાય છે, જોકે આ વ્યક્તિ કે કારનો પોલીસ વિભાગ સાથે કોઈ વાસ્તવિક સંબંધ છે કે નહીં તે હજુ સ્પષ્ટ થયું નથી.

વીડિયો સોશિયલ મીડિયા પર વાયરલ થતાં બાગપત પોલીસ હરકતમાં

આ વિચિત્ર ઘટનાનો વીડિયો સોશિયલ મીડિયા પર વાયરલ થતાં જ નેટિઝન્સે ભારે ટ્રોલિંગ શરૂ કર્યું હતું. આ અંગે બાગપત પોલીસે સ્પષ્ટતા આપતા જણાવ્યું છે કે આ મામલે બરોત પોલીસ સ્ટેશનમાં કોઈ સત્તાવાર ફરિયાદ કે NHAI (નેશનલ હાઈવે ઓથોરિટી ઓફ ઈન્ડિયા) તરફથી કોઈ માહિતી મળી નથી. પરંતુ વાયરલ વીડિયોના આધારે પોલીસે ઘટનાની સત્યતા તપાસવાનું શરૂ કર્યું છે. વાહનના નંબર અને તથ્યો ચકાસ્યા બાદ જ જરૂરી કાનૂની કાર્યવાહી કરવામાં આવશે.

લખનૌમાં પણ બનેલી આવી જ 'છોડ ચોરી'ની ઘટના

નોંધનીય છે કે, હાઈવે કે જાહેર સ્થળોએથી છોડ ચોરી થવાનો આ પહેલો કિસ્સો નથી. અગાઉ ડિસેમ્બર ૨૦૨૫માં લખનૌ ખાતે વડાપ્રધાન નરેન્દ્ર મોદી દ્વારા 'રાષ્ટ્ર પ્રેરણા સ્થળ'નું ઉદ્ઘાટન કરવામાં આવ્યું હતું, તેના થોડા જ સમય બાદ લક્ઝરી કારમાં આવેલા લોકો રસ્તાના કિનારે સુશોભન માટે મૂકેલા કૂંડા અને છોડ ચોરીને ભાગી ગયા હતા. બાગપતની આ ઘટનાએ ફરી એકવાર લોકોની નાગરિક વિવેકબુદ્ધિ સામે સવાલો ઊભા કર્યા છે.