મુંબઈ : મુંબઈ પોલીસે એક આંતરરાષ્ટ્રીય ડ્રગ તસ્કરી નેટવર્કનો પર્દાફાશ કરીને ગોરેગાંવ વિસ્તારમાંથી ૩૧ વર્ષીય ફ્રીલાન્સ મેકઅપ આર્ટિસ્ટ ફુલચંદ ઈશ્વરદયાલ કશ્યપની રૂ. ૩.૩૬ કરોડના કોકેઈન સાથે ધરપકડ કરી છે. મૂળ ઉત્તર પ્રદેશના ઉન્નાવના અને મલાડના મઢ ગામમાં રહેતા આરોપી પાસેથી પ્રારંભિક તલાશીમાં ૬ ગ્રામ અને તેના ઘરના માળિયામાંથી છુપાવેલું ૬૭૨ ગ્રામ મળીને એકંદર ૬૭૮ ગ્રામ ઉચ્ચ ગુણવત્તાનું કોકેઈન જપ્ત કરવામાં આવ્યું છે, જેનું કુલ મૂલ્ય રૂ. ૩,૩૮,૯૮,૫૦૦ આંકવામાં આવ્યું છે.

બાંગુર નગર પોલીસની એટીસી ટીમે ૨ નવેમ્બરે રાત્રે ગોરેગાંવ લિંક રોડ પર શંકાસ્પદ હિલચાલ જણાતાં ભાગવાનો પ્રયાસ કરતા ફુલચંદને ઝડપી પાડ્યો હતો. પૂછપરછ દરમિયાન તેના ઘરમાં વધુ જથ્થો હોવાનો ખુલાસો થયો હતો. પોલીસને શંકા છે કે આરોપી કોઈ આંતરરાષ્ટ્રીય ડ્રગ સિન્ડિકેટ માટે કેરિયર તરીકે કામ કરી રહ્યો હતો અને વિદેશથી માદક પદાર્થો મુંબઈમાં સપ્લાય કરવામાં સામેલ હતો, જેથી કાયદાકીય રીતે અત્યંત ગંભીર એવી કોમર્શિયલ ક્વોન્ટિટી કલમો હેઠળ ગુનો નોંધવામાં આવ્યો છે.

આરોપીને બોરીવલીની સ્થાનિક અદાલતમાં રજૂ કરવામાં આવતા તેને પોલીસ કસ્ટડીમાં મોકલવાનો હુકમ કરાયો છે. પોલીસ અધિકારી મચ્છીન્દ્ર ખેડકરની ફરિયાદના આધારે હવે આરોપીના મોબાઈલ ડેટા, શંકાસ્પદ સંપર્કો, કોકેઈનનો મૂળ સ્ત્રોત અને મુંબઈમાં તેના સંભવિત ખરીદદારો તથા સાગરીતો સુધી પહોંચવા માટે ઊંડાણપૂર્વક પૂછપરછ હાથ ધરવામાં આવી રહી છે.

નોંધનીય છે કે, મુંબઈમાં તાજેતરના સમયમાં ડ્રગ્સ જપ્તીના કેસોમાં મોટો ઉછાળો આવ્યો છે, જેમાં ઓક્ટોબર માસમાં યોજાયેલી ખાસ ઝૂંબેશ દરમિયાન ૧૫.૮૭ કરોડનો નશીલો પદાર્થ તેમજ દિંડોશીમાંથી ૧.૨૮ કરોડનું મેફેડ્રોન જપ્ત કરાયું હતું. તાજી ઘટના બાદ પશ્ચિમી ઉપનગરોમાં ડ્રગ્સ સપ્લાયની જાળ તોડી પાડવા માટે પોલીસે સ્પેશિયલ સર્વેલન્સ ગોઠવી દીધું છે અને આગળની કાનૂની કાર્યવાહી વેગવંતી બનાવી છે.